सीसीटीव्हीने धागा दिला,गुप्त माहितीने आरोपी गाठला!

मोहितेवाडीतील घरफोडीचा गुन्हे शाखा युनिट-३ने लावला छडा; आहिल्यानगरमधून आरोपी जेरबंद, दोन लाखांची रोकड जप्त

पिंपरी चिंचवड : चाकण परिसरातील मोहितेवाडी-शेलपिंपळगाव येथे भरदिवसा घराचे कुलूप तोडून सोन्याचे दागिने लंपास करणाऱ्या चोरट्यांचा अखेर गुन्हे शाखा युनिट-३ने पर्दाफाश केला. सीसीटीव्ही फुटेजचा माग काढत पोलिसांनी गुप्त बातमीदाराच्या माहितीची सांगड घातली आणि थेट आहिल्यानगर गाठत एका आरोपीच्या मुसक्या आवळल्या. पोलिसांच्या चौकशीत त्याने साथीदारासह घरफोडी केल्याची कबुली दिल्याचे पोलिसांनी सांगितले आहे.

दि. २४ जुलै २०२६ रोजी सकाळी ११.३० ते दुपारी २.३० या वेळेत ढासे वस्ती, मोहितेवाडी, शेलपिंपळगाव येथील अमोल एकनाथ पोतले यांच्या घराला चोरट्यांनी लक्ष्य केले. घराच्या मुख्य दरवाज्याचा कडी-कोयंडा व कुलूप हत्याराच्या सहाय्याने तोडून चोरट्यांनी घरात प्रवेश केला. त्यानंतर बेडरूममधील कपाटाचा लॉकर उघडून त्यातील सोन्याचे दागिने लंपास करून पोबारा केला.

या घटनेने परिसरात खळबळ उडाली होती. याप्रकरणी चाकण दक्षिण पोलीस ठाण्यात गुन्हा रजिस्टर क्रमांक ६२२/२०२६, भारतीय न्याय संहिता कलम ३३१(३), ३०५ अन्वये गुन्हा दाखल करण्यात आला होता.

गुन्ह्याचे गांभीर्य लक्षात घेऊन वरिष्ठांच्या आदेशानुसार गुन्हे शाखा युनिट-३ने समांतर तपास सुरू केला. पथकाने घटनास्थळ परिसरातील सीसीटीव्ही फुटेज तपासून चोरट्यांच्या हालचालींचा माग काढण्यास सुरुवात केली.

तपासाला वेग आला असतानाच पोलीस हवालदार क्रमांक ८९३ सोनवणे यांना गुप्त बातमीदारामार्फत या गुन्ह्यातील आरोपींबाबत महत्त्वाची माहिती मिळाली. फिलीप नादर चव्हाण (वय ३३, रा. चिचोंडी पाटील, ता. जि. आहिल्यानगर) आणि छगन चिंतामण काळे (रा. कडा, आष्टी, ता. जि. बीड) यांनी हा गुन्हा केल्याची माहिती मिळाल्यानंतर पोलिसांनी क्षणाचाही विलंब न करता कारवाईची तयारी केली.

मिळालेल्या माहितीची खातरजमा करून गुन्हे शाखेचे पथक तातडीने चिचोंडी पाटील, आहिल्यानगर येथे रवाना झाले. पोलिसांनी सापळा रचून फिलीप नादर चव्हाण याला शिताफीने ताब्यात घेतले.

त्याला विश्वासात घेऊन कौशल्यपूर्ण पद्धतीने सखोल चौकशी केली असता, त्याने साथीदार छगन काळे याच्यासोबत मोहितेवाडी येथे घरफोडी केल्याची कबुली दिल्याचे पोलिसांनी नमूद केले आहे.

चोरी केलेल्या सोन्याच्या दागिन्यांबाबत चौकशी केली असता, छगन काळे याने सोन्याच्या मोबदल्यात फिलीप चव्हाण याला २ लाख रुपये दिल्याचे तपासात समोर आले. त्याच्या वाट्याला आलेल्या रकमेतून २ लाख रुपयांची रोख रक्कम पोलिसांनी फिलीप चव्हाण याच्याकडून जप्त केली.

या कारवाईमुळे भरदिवसा झालेल्या घरफोडीचा महत्त्वाचा धागा पोलिसांच्या हाती लागला असून, साथीदार छगन काळे याचा शोध सुरू आहे. गुन्ह्याचा पुढील तपास चाकण दक्षिण पोलीस ठाणे करीत आहे.

ही कारवाई पोलीस आयुक्त विनय कुमार चौबे, पोलीस सहआयुक्त डॉ. शशिकांत महावरकर, अपर पोलीस आयुक्त सारंग आवाड, पोलीस उपायुक्त (गुन्हे) रोहिदास पवार, सहायक पोलीस आयुक्त (गुन्हे) डॉ. सुदर्शन राठोड आणि सहायक पोलीस आयुक्त (प्रशासन) सचिन कदम यांच्या आदेश व मार्गदर्शनाखाली करण्यात आली.

गुन्हे शाखा युनिट-३चे वरिष्ठ पोलीस निरीक्षक संतोष कसबे, पोलीस उपनिरीक्षक भरत गोसावी, सुनील जावळे तसेच पोलीस अंमलदार सोनवणे, भोसुरे, इचके, साबळे, खेडकर, गुंजाळ, राळे, दांगट आणि थोरात यांच्या पथकाने ही उल्लेखनीय कामगिरी केली.