स्थायी समितीच्या बैठकीत नागरिकांच्या सुविधांना प्राधान्य; बस डेपो, महिला वसतिगृह, स्वच्छता, रस्ते, शाळा व पशुवैद्यकीय सेवांबाबत महत्त्वाचे निर्णय
पिंपरी, दि. १६ सप्टेंबर २०२६ : पिंपरी-चिंचवड शहरातील नागरिकांच्या दैनंदिन गरजा आणि नागरी सुविधांना प्राधान्य देत महापालिकेच्या स्थायी समितीच्या साप्ताहिक बैठकीत विविध महत्त्वपूर्ण विकासकामांच्या प्रस्तावांना मंजुरी देण्यात आली. पाणीपुरवठा, जलनिःसारण, दिव्यांग कल्याण, सार्वजनिक वाहतूक, महिला सुविधा, स्वच्छता, रस्ते, शिक्षण, आरोग्य आणि पशुवैद्यकीय सेवांशी संबंधित प्रस्तावांवर बैठकीत निर्णय घेण्यात आले.
स्थायी समिती सभापती अभिषेक बारणे यांच्या अध्यक्षतेखाली झालेल्या बैठकीस अतिरिक्त आयुक्त प्रदीप जंगम, विक्रांत बगाडे, तृप्ती सांडभोर यांच्यासह समिती सदस्य तसेच महापालिकेच्या विविध विभागांचे अधिकारी व कर्मचारी उपस्थित होते.
नवी सांगवीतील पाणीपुरवठ्याला मंजुरी
पाणीपुरवठा विभागांतर्गत नवी सांगवी परिसरातील नागरिकांना टँकरद्वारे पाणीपुरवठा करण्याच्या कामास मंजुरी देण्यात आली. जलनिःसारण विभागांतर्गत जलनिःसारण नलिकांची आधुनिक पद्धतीने देखभाल व दुरुस्ती करण्याच्या कामालाही मान्यता देण्यात आली.
दिव्यांग भवनात आधुनिक सुविधांचा विस्तार
मोरवाडी येथील सुमारे २४ हजार चौरस फूट क्षेत्रफळाच्या दिव्यांग भवनात दिव्यांग नागरिकांसाठी विविध अत्याधुनिक सुविधा उपलब्ध करून देण्याचा प्रस्ताव मंजूर करण्यात आला. यामध्ये थेरपी, समुपदेशन, फिजिओथेरपी, हायड्रोथेरपी, स्पीच थेरपी, ऑक्युपेशनल थेरपी, कौशल्य व व्यावसायिक मार्गदर्शन केंद्र, ऑडिटोरियम आणि लायब्ररी यांचा समावेश आहे.दिव्यांग भवनाचे प्रभावी व्यवस्थापन करण्यासाठी आवश्यक संचालक मंडळाच्या रचनेबाबतच्या प्रस्तावासही मंजुरी देण्यात आली.
वाकडमध्ये बस डेपो आणि चार्जिंग स्टेशन
मौजे वाकड येथील पीएमपीएमएल बस डेपो व कार्यालयाची इमारत विकसित करण्याबरोबरच बसेससाठी चार्जिंग स्टेशन उभारण्याच्या कामासाठी आवश्यक उच्चदाब भूमिगत विद्युत वाहिनी आणि वीजपुरवठ्याशी संबंधित कामांना मान्यता देण्यात आली.
महिला वसतिगृहासाठी निधी लेखाशीर्षात सुधारणा
प्रभाग क्र. २५, वाकड येथे कार्यरत महिलांसाठी बांधण्यात येणाऱ्या वसतिगृहाच्या कामासाठी चालू आर्थिक वर्षातील जमा-खर्च लेखाशीर्षात आवश्यक सुधारणा करण्यास मंजुरी देण्यात आली.
‘झिरो वेस्ट’ प्रकल्पाला मुदतवाढ
स्वच्छ महाराष्ट्र भारत अभियानांतर्गत ‘क’ क्षेत्रीय कार्यालयाच्या हद्दीत महिला बचत गटाच्या माध्यमातून राबविण्यात येणाऱ्या शून्य कचरा (Zero Waste) प्रकल्पाला मुदतवाढ व मंजुरी देण्यात आली.
याशिवाय प्रभाग क्र. ११ मधील विविध मनपा कार्यक्रमांसाठी मंडप व्यवस्था करणे तसेच प्रभाग क्र. २२, काळेवाडी आणि प्रभाग क्र. १८, चिंचवड येथील रस्ते दुरुस्तीच्या कामांसाठी निविदा प्रक्रिया पूर्ण करून पुढील करारांना मंजुरी देण्यात आली.
शाळांतील सीसीटीव्हीची वार्षिक देखभाल
महापालिकेच्या प्राथमिक शाळांमध्ये बसविण्यात आलेल्या सीसीटीव्ही यंत्रणेची वार्षिक तत्त्वावर देखभाल व दुरुस्ती करण्याच्या कामास मान्यता देण्यात आली.
महापालिका हद्दीतील दिव्यांग व्यक्तींना मोफत बस पास देणे तसेच ६० वर्षांवरील अंध व्यक्तींच्या सोबतीदारांना बस प्रवासाचा पास देण्याच्या योजनेअंतर्गत झालेल्या प्रत्यक्ष खर्चासही मंजुरी देण्यात आली.
चऱ्होलीतील नवीन रस्त्यांवर स्ट्रीट लाईट
प्रभाग क्र. ०३, चऱ्होली येथे नव्याने तयार करण्यात आलेल्या रस्त्यांवर स्ट्रीट लाईट सुरू करण्यासाठी नवीन वीजमीटर घेण्यास आणि वीजपुरवठा कार्यान्वित करण्यास मान्यता देण्यात आली.
पशुवैद्यकीय सेवांसाठी मनुष्यबळ उपलब्ध होणार
महापालिकेच्या विविध पशुवैद्यकीय रुग्णालये, ॲम्ब्युलन्स, डॉग व्हॅन, डॉग पार्क आदी ठिकाणी आवश्यक मनुष्यबळ पुरविण्यासाठी एजन्सीची निवड करून कामाचे आदेश देण्यास मंजुरी देण्यात आली.
निवडणूक कामकाजासाठी झेरॉक्स सेवेचा दरकरार
महापालिकेच्या विविध विभागांचे दैनंदिन कामकाज तसेच आगामी सार्वत्रिक निवडणूक कामकाजासाठी मतदार याद्या व इतर आवश्यक कागदपत्रांच्या झेरॉक्स प्रती काढण्याच्या कामासाठी दरकरार निश्चित करण्यास मान्यता देण्यात आली.
सेवानिवृत्त व मयत कर्मचाऱ्यांची वेतन पडताळणी आणि पेन्शनविषयक प्रकरणे तातडीने निकाली काढण्यासाठी अनुभवी सेवानिवृत्त अधिकाऱ्यांची मानधनावर पुनर्नियुक्ती करण्यासही मंजुरी देण्यात आली.
शाळा, रुग्णालयांसाठी भांडवली कामांना चालना
बाळासाहेब ठाकरे नागरी लोककल्याण अभियानांतर्गत प्राप्त अनुदानातून शाळांमध्ये प्रयोगशाळा व वाचनालय विकसित करणे, जिम उपकरणे बसविणे तसेच रुग्णालयांसाठी आवश्यक वैद्यकीय उपकरणे खरेदी करणे यांसारख्या भांडवली कामांचा समावेश करण्यास मंजुरी देण्यात आली.
स्वच्छ सर्वेक्षण २०२५ मोहिमेचा भाग म्हणून शहरातील विविध प्रभागांमध्ये नागरिकांमध्ये स्वच्छतेबाबत जनजागृती करण्यासाठी संदेश, घोषवाक्ये आणि बोलकी चित्रे रंगविण्याच्या कामांनाही मान्यता देण्यात आली.
“नागरिकांना वेळेत दर्जेदार सुविधा मिळणे ही महापालिकेची जबाबदारी”
“पिंपरी-चिंचवड शहरातील नागरिकांना अधिक सक्षम, दर्जेदार आणि वेळेत नागरी सुविधा उपलब्ध करून देणे ही महापालिकेची प्रमुख जबाबदारी आहे. आजच्या स्थायी समितीच्या बैठकीत पाणीपुरवठा, जलनिःसारण, दिव्यांग कल्याण, सार्वजनिक वाहतूक, महिला सुविधा, स्वच्छता, शिक्षण, आरोग्य आणि पायाभूत सुविधांशी संबंधित विविध महत्त्वपूर्ण प्रस्तावांना मंजुरी देण्यात आली आहे.या निर्णयांची प्रभावी आणि वेळेत अंमलबजावणी होऊन त्याचा थेट लाभ नागरिकांना मिळावा, यासाठी प्रशासनाने आवश्यक कार्यवाही करावी. शहराच्या सर्वांगीण विकासासाठी नागरिकांच्या गरजा लक्षात घेऊन अशाच प्रकारे सकारात्मक आणि लोकाभिमुख निर्णय घेण्यास स्थायी समिती कटिबद्ध आहे.”
— अभिषेक बारणे, सभापती, स्थायी समिती, पिंपरी-चिंचवड महापालिका
