पिंपरी चिंचवड : पिंपरी-चिंचवड पोलीस आयुक्तालयाच्या वतीने ‘नॉर्थईस्ट कम्युनिटी ऑर्गनायझेशन’च्या विद्यार्थी व नागरिकांसाठी सायबर क्राईम जनजागृती कार्यक्रमाचे आयोजन करण्यात आले. शनिवारी (दि. ५ सप्टेंबर) पोलीस आयुक्तालयातील शिवनेरी हॉल येथे झालेल्या या उपक्रमाला ईशान्य भारतातील नागरिकांचा उत्स्फूर्त प्रतिसाद मिळाला.
पिंपरी-चिंचवड पोलीस आयुक्तालयाच्या हद्दीत व्यवसाय व शिक्षणानिमित्त वास्तव्यास असलेल्या ईशान्य भारतातील नागरिकांना या कार्यक्रमासाठी निमंत्रित करण्यात आले होते. ‘नॉर्थईस्ट कम्युनिटी ऑर्गनायझेशन’चे अध्यक्ष सिंगम होरम, माजी अध्यक्ष सोरिओ हिटलर यांच्यासह ईशान्य भारतातील २२ नागरिक या कार्यक्रमाला उपस्थित होते.
अपर पोलीस आयुक्त (गुन्हे) सारंग आवाड तसेच अपर पोलीस आयुक्त (प्रादेशिक विभाग) बसवराज तेली यांनी उपस्थित नागरिकांशी संवाद साधत मार्गदर्शन केले. त्यानंतर पोलीस उप आयुक्त, विशेष शाखा धीरज पाटील, सहायक पोलीस आयुक्त, विशेष शाखा सुनिल पंधरकर, सहायक पोलीस आयुक्त, आर्थिक गुन्हे व सायबर रोहिणी बानकर, सायबर पोलीस ठाण्याचे पोलीस निरीक्षक रविकिरण नाळे, पोलीस उपनिरीक्षक सागर पोमण तसेच अन्य अधिकारी उपस्थित होते.
अधिकाऱ्यांनी बँकिंगमधील ऑनलाइन फसवणूक, सायबर गुन्ह्यांच्या विविध पद्धती, बनावट लिंक, ऑनलाइन व्यवहारांमध्ये घ्यावयाची खबरदारी याबाबत नागरिकांना मार्गदर्शन केले. फसवणूक झाल्यास तातडीने कोणती पावले उचलावीत, याबाबतही माहिती देण्यात आली. नागरिकांच्या समस्या जाणून घेत त्यांच्या शंकांचे निरसन करण्यात आले.
सायबर गुन्ह्यांबाबत तक्रार अथवा आर्थिक फसवणूक झाल्यास १९३० या हेल्पलाईन क्रमांकावर तातडीने संपर्क साधावा, आपत्कालीन मदतीसाठी ११२ या क्रमांकावर संपर्क करावा, तसेच अंमली पदार्थांबाबतच्या तक्रारींसाठी ७७९८१००११२ या हेल्पलाईन क्रमांकाचा वापर करावा, असे आवाहन पोलिसांकडून करण्यात आले.
या उपक्रमामुळे ईशान्य भारतातील विद्यार्थी व नागरिकांमध्ये सायबर गुन्ह्यांविषयी जागरूकता निर्माण होण्याबरोबरच पोलीस प्रशासनाबद्दलचा विश्वास, सुरक्षिततेची भावना आणि समाजातील आपलेपणा अधिक दृढ होण्यास मदत झाली.
