अनेक वर्षानंतर पुन्हा एकदा होणार भव्य ‘पिंपरी-चिंचवड महोत्सव २०२६’ ; स्थानिक कलाकार, बालकलाकार, खेळाडू आणि गुणवंतांच्या सहभागावर विशेष भर; शहराच्या सांस्कृतिक चळवळीला मिळणार नवी दिशा
पिंपरी, …. औद्योगिक आणि आधुनिक शहर म्हणून वेगाने विकसित होत असलेल्या पिंपरी-चिंचवडची सांस्कृतिक ओळख अधिक समृद्ध करण्यासाठी ‘पिंपरी-चिंचवड महोत्सव २०२६’ आयोजित करण्यात येत आहे. शहराच्या कानाकोपऱ्यात दडलेल्या कलागुणांना शोधून त्यांना हक्काचे व्यासपीठ उपलब्ध करून देणे, स्थानिक कलाकारांना प्रोत्साहन देणे आणि नागरिकांना विविध कलाविष्कारांचा आनंद देणे, हा या महोत्सवाचा प्रमुख उद्देश असल्याचे महापौर तथा महोत्सवाचे स्वागताध्यक्ष रवि लांडगे यांनी सांगितले.
यावेळी महोत्सवाचे मुख्य संयोजक तथा आमदार अमित गोरखे, मुख्य संयोजक तथा विरोधी पक्षनेते भाऊसाहेब भोईर यांच्यासह विविध क्षेत्रांतील कलाकार, सांस्कृतिक संस्थांचे प्रतिनिधी आणि मान्यवर उपस्थित होते.
पिंपरी-चिंचवडमध्ये संगीत, नाट्य, नृत्य, लोककला, साहित्य, क्रीडा यांसह विविध क्षेत्रांत मोठी प्रतिभा आहे. अनेक कलाकारांकडे गुणवत्ता असूनही त्यांना आपली कला मोठ्या व्यासपीठावर सादर करण्याची अपेक्षित संधी मिळत नाही. ही उणीव भरून काढण्यासाठी महोत्सवात नामवंत कलाकारांसोबतच स्थानिक व नवोदित कलाकारांना संधी उपलब्ध करून देण्यावर भर राहणार आहे तसेच बालकलाकार आणि विद्यार्थ्यांच्या सहभागालाही महोत्सवात विशेष महत्त्व दिले जाणार आहे. नाट्य परिषदेच्या माध्यमातून बालनाट्य, बालकलाकारांसाठी विविध उपक्रम तसेच मुलांच्या कलागुणांना वाव देणाऱ्या स्पर्धांचे नियोजन करण्याचा मानस आहे. योग्य वयात मुलांच्या प्रतिभेला प्रोत्साहन आणि व्यासपीठ मिळाल्यास भविष्यात शहराचे नाव राष्ट्रीय व आंतरराष्ट्रीय स्तरावर उज्ज्वल करणारे कलाकार घडू शकतात, या भूमिकेतून या उपक्रमांची आखणी केली जाणार आहे. यासोबतच शहरातील गुणवंत खेळाडू आणि विविध क्षेत्रांत उल्लेखनीय कामगिरी करणाऱ्या व्यक्तींनाही महोत्सवाशी जोडण्याचा प्रयत्न राहणार आहे.
महापौर रवि लांडगे म्हणाले, “पिंपरी-चिंचवडमध्ये प्रतिभेची कमतरता नाही; गरज आहे ती या प्रतिभेला संधी आणि हक्काचे व्यासपीठ देण्याची. शहरातील कलाकारांना आपली कला सादर करण्यासाठी दुसऱ्या शहरांकडे पाहावे लागू नये, अशी सांस्कृतिक व्यवस्था आपल्याला आपल्या शहरात निर्माण करायची आहे. हा महोत्सव केवळ काही कार्यक्रमांपुरता मर्यादित न राहता कलाकार, बालकलाकार, खेळाडू, विद्यार्थी आणि प्रत्येक कलाप्रेमी पिंपरी-चिंचवडकराचा उत्सव व्हावा, ही आमची भूमिका आहे.”
गणेशोत्सवाच्या काळात शहरातील स्थानिक कलाकारांना विविध कार्यक्रमांमध्ये सादरीकरणाची संधी देण्यात आली होती. त्याला मिळालेल्या सकारात्मक प्रतिसादानंतर आता या संकल्पनेला अधिक व्यापक स्वरूप देण्याचा प्रयत्न ‘पिंपरी-चिंचवड गणेश महोत्सव २०२६’च्या माध्यमातून करण्यात येणार आहे. शहरातील सांस्कृतिक चळवळीला सातत्य मिळावे, नवोदित कलाकारांना प्रोत्साहन मिळावे आणि शहराची स्वतंत्र सांस्कृतिक ओळख अधिक दृढ व्हावी, हा त्यामागील उद्देश आहे.
“शहराचा विकास केवळ रस्ते, इमारती आणि पायाभूत सुविधांमधून होत नाही. शहराची खरी ओळख तेथील कला, संस्कृती, परंपरा आणि कलाकारांमधून घडत असते. पिंपरी-चिंचवडच्या या सांस्कृतिक वैभवाला राज्य आणि देशपातळीवर स्वतंत्र ओळख मिळवून देण्याचा आमचा प्रयत्न आहे,” असेही महापौर लांडगे यांनी नमूद केले.
महोत्सवाचे मुख्य संयोजक तथा आमदार अमित गोरखे म्हणाले, “पिंपरी-चिंचवड हे विविध संस्कृती आणि परंपरांचा सुंदर संगम असलेले शहर आहे. या शहरातील कला, परंपरा आणि नव्या पिढीतील प्रतिभेचे प्रतिबिंब या महोत्सवात दिसले पाहिजे. विशेषतः बालकलाकार, विद्यार्थी आणि नवोदित कलाकारांना मोठ्या व्यासपीठावर आपली गुणवत्ता सिद्ध करण्याची संधी मिळावी, यावर आमचा भर राहणार आहे. ‘पिंपरी-चिंचवड महोत्सव’ शहराच्या सांस्कृतिक ओळखीला नवी उंची देणारा ठरेल.”
महोत्सवाचे मुख्य संयोजक तथा विरोधी पक्षनेते भाऊसाहेब भोईर म्हणाले, “कला आणि संस्कृती ही समाजातील प्रत्येक घटकाला एकत्र आणणारी शक्ती आहे. पिंपरी-चिंचवडमध्ये असंख्य गुणी कलाकार आहेत; मात्र प्रत्येक कलाकाराला आपल्या कलेसाठी मोठे व्यासपीठ मिळतेच असे नाही. या महोत्सवाच्या माध्यमातून अशा कलाकारांना संधी देऊन त्यांच्या कलेचा सन्मान करण्याचा आमचा प्रयत्न आहे. हा महोत्सव कोणत्याही एका व्यक्ती किंवा संस्थेचा न राहता संपूर्ण पिंपरी-चिंचवडकरांचा सांस्कृतिक उत्सव व्हावा, हीच आमची अपेक्षा आहे.”
महोत्सव अधिक लोकाभिमुख, सर्वसमावेशक आणि शहराच्या सांस्कृतिक वैविध्याचे प्रतिनिधित्व करणारा व्हावा, यासाठी कलाकार, सांस्कृतिक संस्था, नाट्य संस्था, पालक, नागरिक आणि विविध क्षेत्रांतील मान्यवरांनी आपल्या सूचना व संकल्पना मांडाव्यात तसेच या सांस्कृतिक पर्वात उत्स्फूर्त सहभाग नोंदवावा, असे आवाहन संयोजकांच्या वतीने करण्यात आले.
