२९ वर्षांच्या प्रदीर्घ कायदेशीर लढ्याला ऐतिहासिक यश; सहा महिन्यांत लाभ देण्याचे प्रशासनाला निर्देश
पिंपरी : प्रतिनिधी…पुणे महानगर परिवहन महामंडळ लिमिटेड (पीएमपीएमएल) मधील हजारो कर्मचारी व निवृत्त कर्मचाऱ्यांना मोठा दिलासा मिळाला आहे. राज्य शासनाच्या नियमांप्रमाणे पीएमपीएमएल कर्मचाऱ्यांना निवृत्ती वेतनाचे (पेन्शन) लाभ देण्याचा मार्ग मोकळा झाला असून, उच्च न्यायालयाच्या आदेशाची तातडीने अंमलबजावणी करून संबंधित कर्मचाऱ्यांना सहा महिन्यांच्या कालावधीत पेन्शनचे सर्व लाभ अदा करावेत, असे निर्देश पिंपरी-चिंचवड महापालिकेच्या स्थायी समितीचे सभापती तथा पीएमपीएमएलचे संचालक अभिषेक बारणे यांनी प्रशासनाला दिले आहेत.
प्रशासनाला पत्राद्वारे कडक सूचना
उच्च न्यायालयाच्या याचिका क्रमांक ५६२७/२०१३ मधील निर्णयाची अंमलबजावणी करण्यासाठी अभिषेक बारणे यांनी विशेष पुढाकार घेतला आहे. त्यांनी पीएमपीएमएलचे अध्यक्ष व व्यवस्थापकीय संचालक (सीएमडी) यांना पत्र पाठवून न्यायालयाच्या आदेशानुसार आवश्यक ती कार्यवाही तातडीने करण्याच्या सूचना दिल्या आहेत.
न्यायालयाच्या आदेशानुसार कर्मचाऱ्यांना सहा महिन्यांच्या विहित कालावधीत निवृत्ती वेतनाचे लाभ मिळणे आवश्यक असल्याने प्रशासनाने कोणतीही दिरंगाई न करता नियमांनुसार कार्यवाही पूर्ण करावी, असे बारणे यांनी स्पष्ट केले आहे.
२९ वर्षांच्या संघर्षानंतर मिळाले यश
पीएमपीएमएल कर्मचाऱ्यांना पेन्शनचा लाभ मिळावा यासाठी तब्बल २९ वर्षांपासून संघर्ष सुरू होता. पुणे महानगरपालिका, पिंपरी-चिंचवड महापालिका तसेच शिक्षण मंडळातील कर्मचाऱ्यांना निवृत्ती वेतनाचे लाभ मिळत असताना पीएमपीएमएल कर्मचाऱ्यांना मात्र या लाभापासून वंचित राहावे लागत होते.
या प्रकरणात २ मे २०१३ रोजी औद्योगिक न्यायालय, पुणे यांनी कर्मचाऱ्यांच्या बाजूने निर्णय देत पेन्शन देण्याचे आदेश दिले होते. या निर्णयाविरोधात पीएमपीएमएल प्रशासनाने उच्च न्यायालयात याचिका दाखल केली होती. मात्र, उच्च न्यायालयाने प्रशासनाची याचिका फेटाळून कर्मचाऱ्यांच्या बाजूने निर्णय दिला. तसेच सहा महिन्यांच्या आत निवृत्ती वेतनाचे लाभ देण्याचे निर्देश दिले.
निवृत्त कर्मचाऱ्यांकडून बारणे यांचा सत्कार
उच्च न्यायालयाच्या निर्णयानंतर तसेच प्रशासनाकडे तातडीने कार्यवाहीसाठी पाठपुरावा सुरू केल्याबद्दल निवृत्त कर्मचाऱ्यांनी अभिषेक बारणे यांची भेट घेतली. यावेळी निवृत्त कर्मचाऱ्यांच्या शिष्टमंडळाने पुष्पगुच्छ देऊन बारणे यांचा सत्कार केला आणि त्यांच्या पाठिंब्याबद्दल आभार मानले.
दीर्घकाळ प्रलंबित असलेला पेन्शनचा प्रश्न मार्गी लागण्याची शक्यता निर्माण झाल्याने निवृत्त कर्मचाऱ्यांमध्ये समाधानाचे वातावरण आहे.
“पीएमपीएमएलचे कर्मचारी हे पुणे आणि पिंपरी-चिंचवड शहराच्या सार्वजनिक वाहतुकीचा मुख्य कणा आहेत. महापालिकेच्या इतर कर्मचाऱ्यांप्रमाणे पीएमपीएमएल कर्मचाऱ्यांनाही राज्य शासनाच्या नियमानुसार निवृत्ती वेतनाचा लाभ मिळणे हा त्यांचा हक्क आहे. २९ वर्षांच्या प्रदीर्घ लढ्यानंतर मिळालेला हा विजय ऐतिहासिक आहे.
उच्च न्यायालयाच्या आदेशानुसार कर्मचाऱ्यांना सहा महिन्यांच्या कालावधीत पेन्शनचे लाभ मिळाले पाहिजेत. यासाठी पीएमपीएमएल प्रशासनाला पत्राद्वारे स्पष्ट सूचना दिल्या आहेत. कर्मचाऱ्यांच्या हक्कासाठी आवश्यक तो पाठपुरावा करण्यात येईल.”
— अभिषेक बारणे, सभापती, स्थायी समिती, पिंपरी-चिंचवड महापालिका
