पुणे,मोशी प्रतिनिधी …..एमआयडीसी भोसरी पोलिस ठाण्यात विवाहित महिलेला मानसिक त्रास देत आत्महत्येस प्रवृत्त केल्याप्रकरणी चार जणांविरुद्ध गुन्हा दाखल करण्यात आला आहे. हा प्रकार सन २०२१ पासून १२ ऑगस्ट २०२६ रोजी सायंकाळी साडेसहा वाजेपर्यंत मोशी येथील संजय गांधीनगर परिसरात घडल्याचे पोलिसांनी नमूद केले आहे.
याप्रकरणी लोभाजी दशरथ वक्ते (वय ४५, रा. सिरसदेवी, ता. गेवराई, जि. बीड) यांनी फिर्याद दिली आहे. त्यानुसार एमआयडीसी भोसरी पोलिस ठाण्यात गुन्हा रजि. क्र. ४१६/२०२६ अन्वये भारतीय न्याय संहिता कलम १०८, ३५२, ३(५) अन्वये गुन्हा दाखल करण्यात आला आहे.
फिर्यादीच्या मुलीला लग्नामध्ये मानपान केला नाही, लग्नासाठी खर्च केला नाही, तसेच तिला दोन मुलीच झाल्याच्या कारणावरून वारंवार टोमणे मारण्यात येत होते, असा आरोप फिर्यादीने केला आहे. याशिवाय तिचे पती मोशी कचरा डेपो दुर्घटनेत मृत्युमुखी पडले होते. त्यांच्या मृत्यूनंतर मिळणाऱ्या मदतनिधीच्या पैशांच्या वाटपावरूनही वाद निर्माण करून शिवीगाळ व मानसिक छळ करण्यात आल्याचे तक्रारीत म्हटले आहे.
या सततच्या त्रासाला कंटाळून संबंधित महिलेने आत्महत्या केली असून, तिच्या मृत्यूस आरोपी कारणीभूत असल्याचा आरोप फिर्यादीने केला आहे.या प्रकरणात दोन महिला आरोपींसह सर्जेराव गायकवाड, दीपक मकासरे, स्वप्निल सर्जेराव गायकवाड व सायली स्वप्निल गायकवाड यांचा उल्लेख पोलिस नोंदीत करण्यात आला आहे. पोलिसांकडून पुढील तपास सुरू आहे.
