पुणे, दक्षिण म्हाळुंगे प्रतिनिधी…..पुणे जिल्ह्यातील खेड तालुक्यातील कुरुळी येथे एका महिलेचा गळा आवळून खून केल्यानंतर तिच्या पतीने गळफास घेऊन आत्महत्या केल्याची धक्कादायक घटना समोर आली आहे. या प्रकरणी दक्षिण महाळुंगे पोलीस ठाण्यात खुनाचा गुन्हा दाखल करण्यात आला आहे.
पोलिसांनी दिलेल्या माहितीनुसार, १२ ऑगस्ट रोजी रात्री ११.१५ वाजल्यापासून १३ ऑगस्ट रोजी पहाटे ४ वाजण्यापूर्वी कुरुळी गावच्या हद्दीतील अमित बाजीराव बधाले यांच्या भाड्याच्या खोलीत ही घटना घडली. मृत महिलेचे नाव प्रियांका असल्याचे फिर्यादीत नमूद करण्यात आले आहे.
फिर्यादी बंडु आत्माराम धुमाळ (वय ५८, व्यवसाय शेती, रा. शिवणी, ता. बीड, जि. बीड) यांच्या तक्रारीनुसार, आरोपी महादेव मारुती इगवे (वय ३५) याला प्रियांका आणि निलेश दिलीप कांबळे यांच्यात प्रेमसंबंध असल्याची माहिती मिळाल्याने त्याने प्रियांकाचा गळा आवळून खून केला. त्यानंतर आरोपी महादेव इगवे यानेही त्याच खोलीत गळफास घेऊन आत्महत्या केल्याचे तक्रारीत नमूद आहे.
या प्रकरणी दक्षिण महाळुंगे पोलीस ठाण्यात गुन्हा रजिस्टर क्रमांक ६६२/२०२६, भारतीय न्याय संहिता कलम १०३(१) तसेच भादंवि कलम ३०२ अन्वये गुन्हा दाखल करण्यात आला आहे. गुन्हा १३ ऑगस्ट रोजी रात्री ९.०१ वाजता दाखल करण्यात आला.
आरोपी महादेव इगवे हा मयत झाल्याचे पोलिस नोंदीत नमूद आहे. या घटनेमागील नेमके कारण, प्रेमसंबंधाबाबतची पार्श्वभूमी आणि घटनेपूर्वी काय घडले, याचा पोलीस तपास सुरू आहे.या प्रकरणाचा तपास पोलीस उपनिरीक्षक पिंजारी व पोलीस उपनिरीक्षक जायभाये करीत आहेत.
