पिंपरी, दि. ६ ऑगस्ट : पिंपरी पोलीस ठाण्यात बुधवारी (५ ऑगस्ट) दोन वेगवेगळे गुन्हे दाखल झाले आहेत. एका प्रकरणात ट्रान्सपोर्टच्या नावाखाली दीड लाख रुपयांची फसवणूक करण्यात आल्याचा आरोप असून, दुसऱ्या प्रकरणात भाजी विक्रेत्यावर धारदार वस्तूने हल्ला करण्यात आला आहे.
पहिल्या प्रकरणात पिंपरी पोलीस ठाण्यात गुन्हा क्रमांक ४९७/२०२६ भारतीय न्याय संहिता कलम ३१६(२), ३१८(४) अन्वये गुन्हा दाखल करण्यात आला आहे. फिर्यादी महिलेच्या ट्रान्सपोर्ट कंपनीला चाकण येथील एल. के. मशीनरी इंडिया प्रा. लि. कंपनीचा ‘कोल्ड चेंबर डाई कास्टिंग मशीन’ हा माल गुरुग्राम (हरियाणा) येथे पोहोचविण्याचे कंत्राट मिळाले होते.
या मालवाहतुकीसाठी ब्रोकर मोहम्मद जुबेर (मोहीतेवाडी, चाकण) याच्या माध्यमातून एचआर-७३-बी-८९७० क्रमांकाचा ट्रक आणि चालक लुकमान यांची व्यवस्था करण्यात आली. आरोपींनी विश्वास संपादन करून मालवाहतुकीच्या नावाखाली ब्रोकरच्या बँक खात्यावर ७० हजार रुपये आणि चालकाच्या स्कॅनरद्वारे ८० हजार रुपये, असे एकूण १ लाख ५० हजार रुपये स्वीकारले. मात्र, माल गुरुग्रामला न पोहोचविता अर्धवट ठिकाणी सोडून आर्थिक फसवणूक केल्याचा आरोप फिर्यादीने केला आहे. या प्रकरणाचा तपास पोलीस करीत आहेत.
दरम्यान, दुसऱ्या घटनेत पिंपरी पोलीस ठाण्यात गुन्हा क्रमांक ४९८/२०२६ भारतीय न्याय संहिता कलम ११८(१) अन्वये गुन्हा दाखल झाला आहे.
फिर्यादी अक्रम रफिक खान (वय २६) हे गणेश स्वीट दुकानासमोरील रस्त्यावर भाजी विक्री करत असताना, शेजारी भाजी विक्री करणाऱ्या एका रिक्षाचालकाशी झालेल्या वादातून त्यांच्यावर धारदार वस्तूने मानेवर वार करण्यात आला. या हल्ल्यात अक्रम खान जखमी झाले असून, आरोपी रिक्षाचालकाचा रिक्षा क्रमांक एमएच-१४-सीयू-१५६७ असल्याचे फिर्यादीत नमूद आहे. आरोपीविरुद्ध गुन्हा दाखल करण्यात आला असून पिंपरी पोलीस पुढील तपास करत आहेत.
