पिंपरी, दि. ५ ऑगस्ट २०२६ : पिंपरी-चिंचवड महानगरपालिकेच्या स्थायी समितीची सभा आज बाबासाहेब त्रिभुवन यांच्या अध्यक्षतेखाली संपन्न झाली. त्यांच्या अध्यक्षतेखाली झालेल्या सभेत नागरिकांच्या दैनंदिन सेवांशी संबंधित विविध महत्त्वपूर्ण विषयांना मान्यता देण्यात आली.
पशुवैद्यकीय सेवा अखंडित ठेवणे, क्रीडा सुविधा व खेळाडूंना प्रोत्साहन, शहरातील पायाभूत सुविधांची दुरुस्ती, आपत्कालीन व्यवस्थापन, सार्वजनिक स्वच्छता तसेच शैक्षणिक व आरोग्य क्षेत्राशी निगडित विविध विषयांवर यावेळी निर्णय घेण्यात आले.
सभेत पशुरुग्णालयातील पशुशल्यचिकित्सक, पशुवैद्यकीय अधिकारी, पॅरावेट कर्मचारी व इतर आवश्यक मनुष्यबळ पुरविण्याच्या सेवेला नवीन निविदा प्रक्रिया पूर्ण होईपर्यंत मुदतवाढ देण्यास मान्यता देण्यात आली. त्यामुळे पशुवैद्यकीय सेवा, प्राणिसंग्रहालयातील सेवा तसेच भटक्या प्राण्यांशी संबंधित अत्यावश्यक सेवा अखंडित सुरू राहण्यास मदत होणार आहे.
महापालिकेच्या विविध विभागांसाठी आवश्यक फर्निचर व साहित्य खरेदी करण्यास मान्यता देण्यात आली. तसेच शहरातील रस्ते, बीआरटी रेलिंग, फुटपाथ दुरुस्ती आणि संबंधित पायाभूत सुविधांच्या कामांना मंजुरी देण्यात आली.
औद्योगिक प्रशिक्षण संस्थेतील वार्षिक परीक्षेसाठी आवश्यक साहित्य उपलब्ध करून देण्यास मान्यता देण्यात आली. तसेच जलशुद्धीकरण केंद्रातील आपत्ती व्यवस्थापनासाठी वापरण्यात येणाऱ्या पंपांच्या संचालन व देखभालीसाठी आवश्यक कार्यवाहीस मंजुरी देण्यात आली.
वायसीएम रुग्णालयाच्या नव्याने उभारण्यात आलेल्या इमारतीस नामकरण करण्याचा प्रस्ताव महापालिका सभेकडे शिफारस करण्याचा निर्णय घेण्यात आला. तसेच सार्वजनिक शौचालये व मुताऱ्यांची यांत्रिक पद्धतीने साफसफाई आणि देखभालीच्या कामास मान्यता देण्यात आली.
अतिवृष्टीच्या पार्श्वभूमीवर अग्निशमन विभागाच्या मदतीसाठी नियुक्त करण्यात आलेल्या आपदा मित्र व ट्रेनी फायरमन यांच्या मानधनासाठी आवश्यक तरतूद करण्यासही मान्यता देण्यात आली. आपत्कालीन परिस्थितीत नागरिकांच्या सुरक्षिततेसाठी आवश्यक मनुष्यबळ उपलब्ध राहावे, यासाठी हा निर्णय महत्त्वपूर्ण ठरणार आहे.
कुस्ती प्रशिक्षण केंद्रातील स्वच्छता, देखभाल व उद्यान व्यवस्थापनाच्या कामास मुदतवाढ देण्यास मान्यता देण्यात आली. यामुळे क्रीडा सुविधांची योग्य देखभाल होऊन खेळाडूंना आवश्यक सुविधा उपलब्ध राहण्यास मदत होणार आहे.
महापालिकेच्या क्रीडा शिष्यवृत्ती योजनेअंतर्गत विद्यार्थी खेळाडूंना प्रोत्साहन देण्यासाठी शिष्यवृत्ती निधीत वाढ करण्यास मान्यता देण्यात आली. तसेच जिल्हास्तरीय कॅरम स्पर्धा आयोजित करण्यासाठी आवश्यक खर्चास मंजुरी देण्यात आली.
स्थायी समितीचे अध्यक्ष बाबासाहेब त्रिभुवन म्हणाले, “महापालिकेच्या अत्यावश्यक सेवा कोणत्याही परिस्थितीत अखंडित राहाव्यात, शहरातील पायाभूत सुविधा अधिक सक्षम व्हाव्यात आणि क्रीडा, शिक्षण, आरोग्य तसेच नागरिकाभिमुख उपक्रमांना आवश्यक पाठबळ मिळावे, या उद्देशाने आज विविध महत्त्वपूर्ण विषयांना मान्यता देण्यात आली आहे. नागरिकांना दर्जेदार आणि वेळेत सेवा उपलब्ध करून देणे हेच आमचे सर्वोच्च प्राधान्य आहे. शहराच्या विकासाला गती देणाऱ्या आणि नागरिकांच्या दैनंदिन जीवनाशी थेट संबंधित असलेल्या कामांना स्थायी समितीच्या माध्यमातून प्राधान्य दिले जाईल.”
सभेत मंजूर करण्यात आलेल्या विविध निर्णयांमुळे महापालिकेच्या अत्यावश्यक सेवा, क्रीडा सुविधा, सार्वजनिक स्वच्छता, पायाभूत सुविधा, आपत्कालीन व्यवस्थापन तसेच शैक्षणिक व आरोग्यविषयक सेवांना अधिक सक्षम करण्यास मदत होणार आहे.
