५ वाहनचोरीचे गुन्हे उघड; २.९५ लाखांचा मुद्देमाल जप्त, १२ गुन्हे दाखल असलेला आरोपी जाळ्यात
पुणे (चिखली), प्रतिनिधी : चिखली पोलीस ठाण्याच्या डी.बी. पथकाने वाहनचोरीच्या घटनांचा छडा लावत दोन सराईत गुन्हेगारांना अटक केली. आरोपींच्या चौकशीतून तब्बल ५ वाहनचोरीचे आणि २ घरफोडीचे गुन्हे केल्याची माहिती समोर आली असून, पाच वाहनचोरीचे गुन्हे उघडकीस आणण्यात पोलिसांना यश आले आहे. आरोपींकडून सुमारे २ लाख ९५ हजार रुपये किमतीची चार मोटारसायकली आणि एक ऑटो रिक्षा जप्त करण्यात आली आहे.
चिखली पोलीस ठाण्याच्या हद्दीत वाहनचोरीच्या वाढत्या घटनांच्या पार्श्वभूमीवर तपास पथकाचे अधिकारी सहायक पोलीस निरीक्षक सुभाष चव्हाण व त्यांच्या पथकाने वाहनचोरांचा शोध सुरू केला होता. तपासादरम्यान पोलिसांनी १५० हून अधिक सीसीटीव्ही फुटेजची बारकाईने पडताळणी केली. त्यातून पोलीस रेकॉर्डवरील वाहनचोर राज ऊर्फ ढेडेकऱ्या राज संतोष बापर्डेकर (वय २३, रा. शिवपार्वती हौसिंग सोसायटी, ताम्हाणेवस्ती, चिखली) हा साथीदारांच्या मदतीने वाहनचोरी करत असल्याची माहिती पोलिसांच्या हाती लागली.
दरम्यान, पोलीस हवालदार प्रविण भोमाळे आणि विनोद व्होनमाने यांना बातमीदारामार्फत आरोपी राज बापर्डेकर याच्याबाबत माहिती मिळाली. त्यानुसार पोलिसांनी सापळा रचून राज संतोष बापर्डेकर आणि शंकरसिंग समंदरसिंग टाक (वय १८, रा. तुळजाभवानी वसाहत, गाडीतळ, हडपसर) यांना शिताफीने ताब्यात घेतले.
दोन्ही आरोपींकडे कसून चौकशी केली असता त्यांनी वाहनचोरी व घरफोडीचे गुन्हे केल्याची कबुली दिल्याचे पोलिसांनी सांगितले. तपासात चिखली पोलीस ठाण्यातील गुन्हा रजि. क्रमांक ४९०/२०२६, ४९८/२०२६, ४७२/२०२६, ४७४/२०२६ आणि ३२२/२०२६ हे पाच वाहनचोरीचे गुन्हे उघडकीस आले.
या कारवाईत पोलिसांनी बुलेट (एमएच ४३ बीटी ०८१४), स्प्लेंडर (एमएच १४ झेडब्ल्यू १०५४), होंडा शाईन (एमएच १४ एलके ८८६३), ऑटो रिक्षा (एमएच १४ एचएम १०३२) आणि सुझुकी ॲक्सेस (एमएच १४ जीएक्स २०७६) अशी पाच वाहने हस्तगत केली.
अटक आरोपी राज संतोष बापर्डेकर हा पोलीस रेकॉर्डवरील सराईत वाहनचोर असून, त्याच्याविरुद्ध यापूर्वी वाहनचोरीचे तब्बल १२ गुन्हे दाखल आहेत. तर दुसरा आरोपी शंकरसिंग टाक हा देखील सराईत गुन्हेगार असून, तो हडपसर, मांजरी, येरवडा आणि निगडी पोलीस ठाण्यात दाखल असलेल्या चार गुन्ह्यांमध्ये पाहिजे आरोपी असल्याची माहिती पोलिसांनी दिली.
या कारवाईमुळे चिखली परिसरातील वाहनचोरीच्या घटनांना आळा घालण्यासाठी पोलिसांना महत्त्वाचे यश मिळाले आहे. आरोपींकडून आणखी काही गुन्हे उघडकीस येण्याची शक्यता असून, पोलिसांकडून पुढील तपास सुरू आहे.
ही कारवाई पोलीस आयुक्त विनय कुमार चौबे, पोलीस आयुक्त डॉ. शशिकांत महावरकर, अपर पोलीस आयुक्त बसवराज तेली, अपर पोलीस आयुक्त सारंग आव्हाड, पोलीस उपआयुक्त श्वेता खेडकर, सहायक पोलीस आयुक्त प्रविण मोरे, चिखली पोलीस ठाण्याचे वरिष्ठ पोलीस निरीक्षक रणजित जाधव आणि पोलीस निरीक्षक (गुन्हे) अमोल फडतरे यांच्या मार्गदर्शनाखाली करण्यात आली.
या कारवाईत स.पो.नि सुभाष चव्हाण, पोहवा किरण काटकर, विनोद व्होनमाने, प्रविण भोमाळे, सुरज सुतार, अरुण साबळे, भरत माने, संतोष भालेराव, अजय गायकवाड, कंठय्या स्वामी, रोहित मोरे, पोलीस शिपाई अनिल राक्षे आणि संतोष भोर यांनी सहभाग घेतला.
