महापौर रवि लांडगे यांच्या हस्ते उद्घाटन; जिल्हाभरातील ४०० हून अधिक कॅरमपटूंचा सहभाग
पिंपरी प्रतिनिधी : पिंपरी-चिंचवड महानगरपालिका क्रीडा विभाग, कॅरम असोसिएशन ऑफ पुणे आणि नवरात्र मित्र मंडळ, इंद्रायणीनगर यांच्या संयुक्त विद्यमाने कै. सोपानराव भोईर यांच्या स्मरणार्थ आयोजित १९ व्या महापौर चषक जिल्हास्तरीय कॅरम स्पर्धा २०२५-२६चा शुभारंभ पिंपरी-चिंचवड महानगरपालिकेचे महापौर रवि लांडगे यांच्या हस्ते उत्साहात करण्यात आला.
चिंचवड येथील कै. मनिषा भोईर विरंगुळा केंद्र, प्रेमलोक पार्क, सावरकर उद्यानाशेजारी या ठिकाणी दि. २९ ते ३१ जुलै २०२६ या कालावधीत ही स्पर्धा रंगणार आहे. पुरुष, महिला आणि ज्येष्ठ नागरिक अशा विविध गटांमध्ये होणाऱ्या या स्पर्धेत पुणे जिल्ह्यातील ४०० हून अधिक कॅरमपटू सहभागी झाले असून, खेळाडूंमध्ये मोठा उत्साह पाहायला मिळत आहे.
कॅरम हा बौद्धिक क्षमता, एकाग्रता, संयम आणि अचूकतेची कसोटी पाहणारा खेळ आहे. शहरातील तसेच जिल्ह्यातील नवोदित आणि गुणवंत खेळाडूंना दर्जेदार व्यासपीठ उपलब्ध करून देणे, त्यांच्यातील कौशल्याला चालना देणे आणि पिंपरी-चिंचवडमध्ये क्रीडा संस्कृती अधिक बळकट करणे, हा या स्पर्धेचा प्रमुख उद्देश आहे.
स्पर्धेतील विविध गटांतील विजेत्या खेळाडूंना एकूण ३ लाख ५६ हजार रुपयांची रोख पारितोषिके तसेच आकर्षक ट्रॉफी देऊन सन्मानित करण्यात येणार आहे.
यावेळी उपमहापौर शर्मिला बाबर, विरोधी पक्षनेते भाऊसाहेब भोईर, क्रीडा विभागाचे उपायुक्त पंकज पाटील यांच्यासह जिल्हाभरातील खेळाडू, क्रीडाप्रेमी आणि विविध क्षेत्रातील मान्यवर मोठ्या संख्येने उपस्थित होते.
“कॅरम हा केवळ मनोरंजनाचा खेळ नसून एकाग्रता, संयम, अचूकता आणि निर्णयक्षमता विकसित करणारा खेळ आहे. महापौर चषक कॅरम स्पर्धेच्या माध्यमातून शहरातील आणि जिल्ह्यातील खेळाडूंना आपले कौशल्य सिद्ध करण्याची मोठी संधी उपलब्ध होत आहे. अशा स्पर्धांमुळे नवोदित खेळाडूंना प्रेरणा मिळते, स्पर्धात्मक वातावरण निर्माण होते आणि क्रीडा क्षेत्राला नवी दिशा मिळते. सर्व स्पर्धकांनी क्रीडाभावना जपत उत्कृष्ट खेळाचे प्रदर्शन करावे.”
……. रवी लांडगे.महापौर. पिंपरी चिंचवड
“कै. सोपानराव भोईर यांच्या स्मृती जपणारी ही स्पर्धा त्यांच्या क्रीडाप्रेमाचा आणि सामाजिक बांधिलकीचा प्रेरणादायी वारसा पुढे नेणारी आहे. महापौर चषकाच्या माध्यमातून ग्रामीण आणि शहरी भागातील गुणवंत खेळाडूंना समान संधी मिळत आहे. अशा स्पर्धांमधून भविष्यात अनेक राष्ट्रीय आणि आंतरराष्ट्रीय दर्जाचे खेळाडू घडतील, असा विश्वास आहे. क्रीडा क्षेत्राच्या विकासासाठी सर्वांनी एकत्रितपणे प्रयत्न करणे ही काळाची गरज आहे.”
……. भाऊसाहेब भोईर.नगरसेवक तथा विरोधी पक्षनेते श.पिंपरी चिंचवड
