पिंपरी-चिंचवड : महाराष्ट्राचे मुख्यमंत्री देवेंद्र फडणवीस यांच्या वाढदिवसानिमित्त प्रभाग क्रमांक १९ मध्ये आयोजित करण्यात आलेल्या भव्य रक्तदान शिबिराला नागरिकांचा उत्स्फूर्त प्रतिसाद मिळाला. सखी सोबती फाऊंडेशनचे संस्थापक अध्यक्ष तथा पिंपरी-चिंचवड महापालिकेचे नगरसेवक शितल उर्फ विजय गोरख शिंदे यांच्या पुढाकारातून आयोजित या सामाजिक उपक्रमात एकाच दिवसात तब्बल १५९ युनिट रक्तसंकलन करण्यात आले.
रविवारी श्रद्धा रेजिडेन्सी, पारस भवनजवळ, उद्योग नगर, चिंचवड येथे पार पडलेल्या या शिबिराचे उद्घाटन विधान परिषदेचे आमदार अमित गोरखे यांच्या हस्ते दीपप्रज्वलन व मुख्यमंत्री देवेंद्र फडणवीस यांच्या प्रतिमेस पुष्पहार अर्पण करून करण्यात आले.
शिबिरात नागरिक, युवक-युवती आणि भाजप पदाधिकारी यांनी उत्साहाने सहभाग नोंदवला. वैद्यकीय मार्गदर्शक तत्त्वांचे काटेकोर पालन करत शिस्तबद्ध पद्धतीने रक्तदान प्रक्रिया पार पडली. रक्तदान करून अनेकांनी सामाजिक बांधिलकी जपत “रक्तदान हेच श्रेष्ठ दान” हा संदेश कृतीतून दिला.
यावेळी ब प्रभाग अध्यक्ष मंदार देशपांडे, स्थायी समिती सदस्या मधुरा नेताजी शिंदे, महेश कुलकर्णी, राजू दुर्गे, महाराष्ट्र प्रदेश महिला मोर्चाच्या प्रदेश सचिव संजीवनी पांडे, शोभा भराडे, मोहन शिंपी सोसायटीचे चेअरमन, पवन गेरेजा, अमोल गुरव, सचिन भुतडा, आशिष थोरवे, तेजस काशी, मिलिंद कुलकर्णी, तुषार अहिरराव यांच्यासह भारतीय जनता पक्षाचे पदाधिकारी, कार्यकर्ते आणि नागरिक मोठ्या संख्येने उपस्थित होते.
यावेळी आयोजकांनी सर्व रक्तदाते, स्वयंसेवक आणि उपस्थितांचे आभार मानत, रक्तदानासारख्या जीवनदायी उपक्रमांमध्ये अधिकाधिक नागरिकांनी सहभागी व्हावे, असे आवाहन केले. रक्ताची टंचाई दूर करण्यासाठी अशा उपक्रमांचे सामाजिक महत्त्व मोठे असून, प्रभाग १९ मधील या शिबिराने सामाजिक उत्तरदायित्वाचा प्रेरणादायी आदर्श निर्माण केला.
