हिंजवडी (प्रतिनिधी): हिंजवडी परिसरात किरकोळ वादातून एका महिलेने युवकाच्या डोक्यावर काचेची बाटली फोडून गंभीर जखमी केल्याची घटना घडली आहे. याप्रकरणी हिंजवडी पोलीस ठाण्यात गुन्हा दाखल करण्यात आला आहे.
पोलीसांनी दिलेल्या माहितीनुसार, दि. २५ जुलै २०२६ रोजी सकाळी सुमारे ५.०० वाजता बी-१ लाऊंज, फेज-२, हिंजवडी (ता. मुळशी, जि. पुणे) येथील बाहेरील पार्किंगमध्ये ही घटना घडली. याप्रकरणी कल्याण भवतराम सुतार (वय ३१, रा. वारजे माळवाडी, पुणे) यांनी फिर्याद दिली आहे.
फिर्यादीनुसार, पार्किंगमध्ये उभे असताना शेजारी थांबलेल्या मोहिनी बसवराज माडेकर उर्फ डॉली (वय २५, रा. गोदरेज ग्रीन सोसायटी, म्हाळुंगे) हिला फिर्यादी यांनी “बाजूला व्हा, मला जायचे आहे,” असे सांगितले. याचा राग आल्याने आरोपी महिलेने तेथे पडलेली काचेची बाटली फिर्यादी यांच्या डोक्यात फोडली. त्यानंतर बाटलीचा तुकडा त्यांच्या डाव्या गालावर लागून त्यांना गंभीर दुखापत झाली, असे फिर्यादीत नमूद करण्यात आले आहे.
या प्रकरणी हिंजवडी पोलीस ठाण्यात गुन्हा रजिस्टर क्रमांक ४९३/२०२६ अन्वये भारतीय न्याय संहिता (BNS) कलम ११८(२) तसेच भादंवि कलम ३२६ अन्वये गुन्हा दाखल करण्यात आला आहे.या गुन्ह्याचा पुढील तपास स.पो.नि वांगणेकर करीत आहेत.
