एक विधिसंघर्षित बालक ताब्यात, दोघांचा शोध
पिंपरी (प्रतिनिधी) : पिंपरीतील रिव्हर रोड परिसरातील कपडा मार्केटमध्ये भरदिवसा कोयत्याचा धाक दाखवत दुकानात घुसून रोकड आणि पूजेचे साहित्य लुटल्याची धक्कादायक घटना घडली. या प्रकरणी पिंपरी पोलीस ठाण्यात गुन्हा दाखल करण्यात आला असून एका विधिसंघर्षित बालकाला ताब्यात घेण्यात आले आहे, तर आणखी दोन विधिसंघर्षित बालकांचा शोध सुरू आहे.
पोलिसांनी दिलेल्या माहितीनुसार, दि. २६ जुलै २०२६ रोजी सायंकाळी सुमारे ४.२२ वाजण्याच्या सुमारास रिव्हर रोडवरील कपडा मार्केटमधील ‘चॉईस व्हरायटी’ या दुकानात ही घटना घडली. फिर्यादी हर्ष प्रदीप पागराणी (वय २१, रा. पिंपरी) यांनी याबाबत तक्रार दिली आहे.
तक्रारीनुसार, फिर्यादी, त्यांचे वडील आणि तीन कामगार दुकानात असताना तीन आरोपी कोयते घेऊन दुकानात घुसले. त्यांनी “हप्ता” म्हणून पैशांची मागणी करत कोयत्याचा धाक दाखवून दुकानातील ३० हजार रुपये रोख, पूजेसाठी ठेवलेले पितळी नाणे आणि गुरु झुलेलाल यांचा फोटो जबरदस्तीने घेऊन पळ काढला.
दरम्यान, फिर्यादी यांनी आरोपींना अडविण्याचा प्रयत्न केला असता, आरोपींनी फायटरसारख्या धारदार हत्याराने त्यांच्या डाव्या हातावर वार करून त्यांना जखमी केले. आजूबाजूचे दुकानदार मदतीला धावून येताच आरोपींनी कोयते उगारून “जो मध्ये येईल त्याचे तुकडे करू” अशी धमकी देत परिसरात दहशत निर्माण केली. त्यामुळे अनेक दुकानदारांनी भीतीपोटी आपली दुकाने बंद केली.
या प्रकरणी पिंपरी पोलीस ठाण्यात गुन्हा क्रमांक ४५८/२०२६ नोंद करण्यात आला असून भारतीय न्याय संहितेतील संबंधित कलमे, भारतीय हत्यार कायदा तसेच महाराष्ट्र पोलीस अधिनियमांतर्गत गुन्हा दाखल करण्यात आला आहे.
या घटनेचा पुढील तपास पोलीस उपनिरीक्षक केणे यांच्या मार्गदर्शनाखाली पिंपरी पोलीस करीत आहेत.
