पिंपरी (प्रतिनिधी): काळेवाडी पोलीस ठाण्याच्या गुन्हे शोध पथकाने घरफोडीच्या दोन गुन्ह्यांचा अवघ्या सहा तासांत छडा लावत दोन सराईत चोरट्यांना आणि एका विधीसंघर्षित बालकाला ताब्यात घेतले. आरोपींकडून ₹१,०८,९७० किमतीचा चोरीचा मुद्देमाल, एक गावठी पिस्तूल आणि दोन जिवंत काडतुसे जप्त करण्यात आली आहेत.
काळेवाडी पोलीस ठाण्याच्या हद्दीत २६ जुलै २०२६ रोजी पहाटे १.३० ते ३ वाजण्याच्या दरम्यान अज्ञात चोरट्यांनी बंद घरांचे कडी-कोयंडे तोडून घरात प्रवेश केला आणि मौल्यवान वस्तू व इतर साहित्य चोरी करून पसार झाले होते. याप्रकरणी काळेवाडी पोलीस ठाण्यात गुन्हे क्रमांक ३१४/२०२६ आणि ३१५/२०२६ अन्वये भारतीय न्याय संहिता (BNS) कलम ३०५, ३३१(२) व ३(५) अंतर्गत गुन्हे दाखल करण्यात आले होते.
गुन्ह्याचा तपास करताना पोलिसांनी सीसीटीव्ही फुटेज, तांत्रिक विश्लेषण आणि गुप्त बातमीदारांकडून मिळालेल्या माहितीच्या आधारे आरोपींचा शोध घेतला. त्यानुसार कैलास अशोक खलसे (वय ४०, रा. भारतनगर, पिंपरी) आणि शुभम शांताराम दुबे (वय २७, रा. अदिनाथ कॉलनी, थेरगाव) यांच्यासह एका विधीसंघर्षित बालकाचा गुन्ह्यात सहभाग निष्पन्न झाला. तिघांना ताब्यात घेऊन कसून चौकशी केल्यानंतर चोरीतील सर्व मुद्देमाल हस्तगत करण्यात आला.
याशिवाय आरोपींकडून एक गावठी पिस्तूल आणि दोन जिवंत काडतुसेही जप्त करण्यात आली असून, अटक करण्यात आलेल्या दोन्ही आरोपींविरुद्ध यापूर्वीही मालमत्तेविरुद्धचे गुन्हे दाखल असल्याची माहिती पोलिसांनी दिली.
ही उल्लेखनीय कारवाई पोलीस आयुक्त विनयकुमार चौबे, सहपोलीस आयुक्त शशिकांत महावरकर, अपर पोलीस आयुक्त सारंग आवाड व बसवराज तेली, पोलीस उपआयुक्त प्रदीप जाधव आणि सहाय्यक पोलीस आयुक्त सुनील कुराडे यांच्या मार्गदर्शनाखाली करण्यात आली.
वरिष्ठ पोलीस निरीक्षक राजेंद्र बहिरट आणि पोलीस निरीक्षक (गुन्हे) सुरेंद्र धुमाळे यांच्या नेतृत्वाखाली सहाय्यक पोलीस निरीक्षक वैभव गुरव तसेच तपास पथकातील अधिकारी व कर्मचाऱ्यांनी ही यशस्वी कारवाई पार पाडली.
