पुणे,तळेगाव दाभाडे, दि. २३ जुलै : तळेगाव एमआयडीसी परिसरातील मंगरुळ येथील रस्त्यावर भरधाव वेगाने जात असलेला ट्रेलर पलटी झाल्याने वाहनाचे मोठे नुकसान झाले. या अपघातात चालक किरकोळ जखमी झाला असून, निष्काळजीपणे वाहन चालवल्याप्रकरणी तळेगाव एमआयडीसी पोलिसांनी गुन्हा दाखल केला आहे.
या प्रकरणी पोलीस शिपाई बापूराव ज्ञानदेव परभाने (वय ४६) यांनी फिर्याद दिली आहे. त्यावरून नितीन सुभाषराव गवळी (वय ४२, सध्या रा. महात्मा फुलेनगर, दापोडी, ता. हवेली, जि. पुणे, मूळ रा. चिकडी, ता. जि. लातूर) याच्याविरुद्ध तळेगाव एमआयडीसी पोलीस ठाण्यात गुन्हा क्रमांक २११/२०२६ दाखल करण्यात आला आहे.
पोलिसांनी दिलेल्या माहितीनुसार, २२ जुलै २०२६ रोजी पहाटे सुमारे २.३० वाजता मंगरुळ (ता. मावळ) येथील सिकॉम सेक्स अँड इंजिनिअरिंग कंपनीजवळ आरोपी त्याच्या ताब्यातील एमएच-०६-ए-२०४८ क्रमांकाचा ट्रेलर भरधाव व निष्काळजीपणे चालवत होता. रस्त्यावरील परिस्थितीकडे दुर्लक्ष झाल्याने ट्रेलर पलटी झाला. अपघातात ट्रेलरची समोरील केबिन तुटून चेंगरली, पुढील काच फुटली तसेच ट्रेलरमधील दोन लोखंडी कॉइल खाली पडून त्यांचे नुकसान झाले.
या अपघातात चालक नितीन गवळी याच्या डाव्या मनगटाला, कपाळाच्या उजव्या बाजूस व उजव्या पायाला किरकोळ दुखापत झाली.
या प्रकरणाचा पुढील तपास पोलीस हवालदार डांगट करीत आहेत.
