३२ प्रभागांतील ४३ केंद्रांवर नागरिकांचा उत्स्फूर्त सहभाग; भाजप शहराध्यक्ष शत्रुघ्न (बापू) काटे यांच्या नेतृत्वाखाली उपक्रम यशस्वी
पिंपरी-चिंचवड, प्रतिनिधी : महाराष्ट्राचे मुख्यमंत्री देवेंद्र फडणवीस यांच्या वाढदिवसानिमित्त भारतीय जनता पार्टी, पिंपरी-चिंचवड शहराच्या वतीने आयोजित करण्यात आलेल्या भव्य महारक्तदान शिबिराला नागरिकांचा अभूतपूर्व प्रतिसाद मिळाला. भाजप पिंपरी-चिंचवड शहराध्यक्ष तथा नगरसेवक शत्रुघ्न (बापू) काटे यांच्या नेतृत्वाखाली बुधवारी (दि. २२ जुलै) शहरातील पिंपरी, चिंचवड आणि भोसरी या तिन्ही विधानसभा मतदारसंघांतील ३२ प्रभागांमध्ये ४३ ठिकाणी एकाच दिवशी रक्तदान शिबिरांचे आयोजन करण्यात आले.
या सामाजिक उपक्रमात युवक, महिला आणि विविध स्तरांतील नागरिकांनी मोठ्या उत्साहाने सहभाग घेत रक्तदान केले. शहरातील शाळा, मंगल कार्यालये, सभागृहे, देवस्थाने आणि संपर्क कार्यालयांमध्ये उभारण्यात आलेल्या रक्तदान केंद्रांवर दिवसभर रक्तदात्यांची मोठी गर्दी पाहायला मिळाली. या सर्व केंद्रांवरून एकूण ४,७२९ रक्तपिशव्यांचे विक्रमी संकलन करण्यात आले.
या महारक्तदान शिबिरासाठी आमदार महेशदादा लांडगे, आमदार शंकरभाऊ जगताप, आमदार उमाताई खापरे, आमदार अमित गोरखे, माजी खासदार अमर साबळे, माजी आमदार अश्विनीताई जगताप, महापौर रवी लांडगे, सभागृहनेते प्रशांत शितोळे, स्थायी समिती सभापती अभिषेक बारणे, उपमहापौर शर्मिलाताई बाबर, संघटन सरचिटणीस मोरेश्वर शेडगे, सरचिटणीस मधुकर बच्चे, वैशाली खाडे, विकास डोळस यांच्यासह ३२ प्रभागांतील नगरसेवक, नगरसेविका, मंडल अध्यक्ष, भाजप पदाधिकारी आणि कार्यकर्त्यांनी सक्रिय सहभाग घेत उपक्रम यशस्वी केला.
रक्तदानासारख्या सामाजिक बांधिलकी जपणाऱ्या उपक्रमाला पिंपरी-चिंचवडकरांनी दिलेला उत्स्फूर्त प्रतिसाद समाजातील संवेदनशीलतेचे आणि सामाजिक उत्तरदायित्वाचे प्रतीक असल्याची भावना यावेळी व्यक्त करण्यात आली.
उपक्रमाच्या यशाबद्दल भाजप शहराध्यक्ष शत्रुघ्न (बापू) काटे यांनी सर्व पदाधिकारी, कार्यकर्ते, सामाजिक संस्था, वैद्यकीय पथके तसेच रक्तदान करणाऱ्या सर्व नागरिकांचे मनःपूर्वक आभार मानले. त्यांनी भविष्यातही अशा लोकहिताच्या सामाजिक उपक्रमांमध्ये नागरिकांनी सक्रिय सहभाग नोंदवावा, असे आवाहन केले.
