पिंपरी (प्रतिनिधी): संत तुकारामनगर पोलीस ठाण्यात सायबर फसवणुकीसाठी स्वतःचे बँक खाते वापरून संघटित सायबर गुन्हेगारीला मदत केल्याप्रकरणी एका व्यक्तीसह त्याच्या साथीदारांविरुद्ध गुन्हा दाखल करण्यात आला आहे.
याप्रकरणी संकेत भागुजी नवले (वय २६), पोलीस शिपाई, संत तुकारामनगर पोलीस ठाणे यांनी फिर्याद दिली आहे. त्यानुसार हेनरी पॉवेल (वय ५३, रा. २३/१८२, वल्लभनगर, किल्लेदार गार्डन, संत तुकारामनगर, पिंपरी) व त्याच्या इतर साथीदारांविरुद्ध संत तुकारामनगर पोलीस ठाण्यात गुन्हा क्रमांक ३१५/२०२६ अंतर्गत भारतीय न्याय संहितेच्या कलम ११२(२), ६१(२), ३१८(४), ३१७(२) व ३(५) नुसार गुन्हा दाखल करण्यात आला आहे.
पोलिसांनी दिलेल्या माहितीनुसार, २६ सप्टेंबर २०२५ ते २९ जून २०२६ या कालावधीत आरोपीने संत तुकारामनगर येथील सुखवानी कॅम्पस परिसरातील दुकानातून स्वतःच्या बँक ऑफ महाराष्ट्र खात्याचा वापर करून साथीदारांशी संगनमताने सायबर फसवणुकीतील आर्थिक व्यवहार केले. या व्यवहारातून आंध्र प्रदेशातील पूर्व गोदावरी जिल्ह्यातील एनसीसीआरपी तक्रारीतील तक्रारदाराची तब्बल ४ लाख रुपयांची फसवणूक झाल्याचे तपासात निष्पन्न झाले आहे. ही रक्कम आरोपीने धनादेशाद्वारे (चेक) काढून घेतल्याचेही समोर आले आहे.
या प्रकरणाचा पुढील तपास पोलीस उपनिरीक्षक बाडेकर करीत आहेत.
