पिंपरी-चिंचवड | प्रतिनिधी…..हिंजवडी पोलिसांनी संघटित सायबर फसवणूक प्रकरणात स्वतःचे बँक खाते वापरण्यास दिल्याच्या आरोपावरून एका व्यक्तीविरुद्ध गुन्हा दाखल केला आहे. या प्रकरणात विविध राज्यांतील सायबर फसवणुकीच्या तक्रारींमधील रक्कम आरोपीच्या खात्यात जमा झाल्यानंतर त्यातील ४० हजार रुपये एटीएमद्वारे काढण्यात आल्याचे तपासात निष्पन्न झाले आहे.
पोलिसांनी दिलेल्या माहितीनुसार, हिंजवडी पोलीस ठाण्यात गुन्हा क्रमांक ४८३/२०२६ भारतीय न्याय संहिता कलम ११२(२),६१(२), ३१८(४),३१७(२) आणि ३(५) अन्वये दाखल करण्यात आला आहे. या प्रकरणी पोलीस अंमलदार आर. व्ही. गोडांबे यांनी फिर्याद दिली आहे.
या गुन्ह्यात बेता प्रसाद आगळे (रा. आगळेवस्ती, चांदखेड, ता. मावळ, जि. पुणे) याच्यावर स्वतःच्या IDBI बँकेच्या खात्याचा वापर सायबर फसवणुकीतील आर्थिक व्यवहारांसाठी करून दिल्याचा आरोप आहे. आरोपीने साथीदारांशी संगनमत करून संघटित सायबर फसवणूक रॅकेटचा सदस्य म्हणून काम केल्याचा संशय पोलिसांनी व्यक्त केला आहे.
तपासादरम्यान केरळ, उत्तर प्रदेश आणि कर्नाटक येथील सायबर फसवणुकीच्या तक्रारींमधील एकूण १ लाख ३० हजार रुपयांच्या व्यवहारांपैकी काही रक्कम आरोपीच्या खात्यात जमा झाल्याचे आढळले. त्यानंतर त्या रकमेतून ४० हजार रुपये एटीएमद्वारे काढण्यात आल्याचे निष्पन्न झाले आहे.या प्रकरणाचा पुढील तपास सपोनि मुंढे करीत असून, सायबर फसवणूक रॅकेटमधील इतर संबंधितांचा शोध सुरू आहे.
