पिंपरी-चिंचवड | प्रतिनिधी….मोशी प्राधिकरण परिसरात रस्त्यावर झालेल्या किरकोळ वादाचे रूपांतर मारहाणीत झाल्याची घटना घडली आहे. या प्रकरणी एमआयडीसी भोसरी पोलिस ठाण्यात तिघांविरुद्ध भारतीय न्याय संहिता २०२३ अंतर्गत गुन्हा दाखल करण्यात आला आहे.
पोलिसांनी दिलेल्या माहितीनुसार, ही घटना दि. १९ जुलै २०२६ रोजी रात्री सुमारे ८.३० वाजता सेक्टर क्रमांक ६, स्पाईन रोड, मोशी प्राधिकरण येथील कुल्वर क्रिस्ट सोसायटीच्या प्रवेशद्वाराजवळ घडली. या प्रकरणी कुणाल भास्कर तोडकर (वय ४३, रा. कुल्वर क्रिस्ट सोसायटी, मोशी) यांनी फिर्याद दिली असून त्यावरून दि. २० जुलै रोजी पहाटे १२.५९ वाजता गुन्हा दाखल करण्यात आला.
या प्रकरणातील आरोपी राजू सुभाष येदे, गोविंद कांबळे आणि गौरव शर्मा (सर्व वय अंदाजे ३० ते ३५ वर्षे, रा. मोशी परिसर) असल्याचे पोलिसांनी नमूद केले आहे.
फिर्यादीनुसार, फिर्यादी आपल्या १४ वर्षीय मुलासोबत पायी फिरत असताना एका पांढऱ्या रंगाच्या कारचालकाने कोणताही इशारा न देता वाहन अचानक त्यांच्या दिशेने वळवले. याबाबत विचारणा केल्याचा राग मनात धरून संबंधितांनी सोसायटीच्या गेटजवळ कार थांबवली. त्यानंतर आरोपींनी शिवीगाळ करत कारमधून लाकडी दांडा काढून फिर्यादीवर हल्ला केला. या हल्ल्यात फिर्यादीच्या उजव्या हाताच्या अंगठ्याला फ्रॅक्चर झाले. तसेच धक्काबुक्की करून आरोपी घटनास्थळावरून पसार झाल्याचे फिर्यादीत म्हटले आहे.
या प्रकरणी एमआयडीसी भोसरी पोलिस ठाण्यात गुन्हा क्रमांक ३७७/२०२६ भारतीय न्याय संहिता २०२३ मधील संबंधित कलमांन्वये नोंद करण्यात आला असून पोलीस उपनिरीक्षक मणेर पुढील तपास करीत आहेत.
