पिंपरी : प्रॉपर्टीच्या वादातून एका महिलेला शिवीगाळ, मारहाण करून दगडाने जखमी केल्याप्रकरणी पिंपरी पोलिसांनी दोन जणांविरुद्ध गुन्हा दाखल केला आहे.
ही घटना ५ जुलै २०२६ रोजी सायंकाळी ४ वाजण्याच्या सुमारास विद्यानगर, चिंचवड येथे घडली. याप्रकरणी मनीषा भारत जाधव (वय ४४, रा. गंजपेठ, पुणे) यांनी फिर्याद दिली आहे.
पोलिसांनी पल्लवी दत्ता भोसले (वय अंदाजे ३५) आणि दत्ता दिगंबर भोसले (वय अंदाजे ४०, दोघेही रा. विद्यानगर, चिंचवड) यांच्याविरुद्ध भारतीय न्याय संहितेच्या संबंधित कलमांनुसार गुन्हा दाखल केला आहे.
फिर्यादी त्यांच्या वडिलांच्या घरी गेल्या असता, प्रॉपर्टीच्या वादातून आरोपींनी त्यांना “तू इथे का आली?” असे म्हणत शिवीगाळ व मारहाण केली. तसेच पुन्हा आल्यास जीवे मारण्याची धमकी दिली. त्यानंतर आरोपी महिलेने घरासमोरील दगड उचलून फिर्यादीच्या डाव्या हातावर मारल्याने त्या जखमी झाल्या. या प्रकरणाचा पुढील तपास पिंपरी पोलीस करत आहेत.
सायबर फसवणुकीसाठी बँक खाते वापरल्याचा आरोप; पिंपरीत गुन्हा दाखल
पिंपरी : संघटित सायबर फसवणूक टोळीला बँक खाते उपलब्ध करून देऊन देशभरातील सात नागरिकांची सुमारे २.७१ लाख रुपयांची फसवणूक केल्याप्रकरणी एका युवकाविरुद्ध पिंपरी पोलिसांनी गुन्हा दाखल केला आहे.
याप्रकरणी महिला पोलीस शिपाई साक्षी भागवत माने यांनी सरकारतर्फे फिर्याद दिली आहे. आरोपी प्रविणकुमार (वय २७, रा. शिवप्रसाद कॉलनी, सेक्टर ३३, चिंचवड) याच्याविरुद्ध भारतीय न्याय संहिता तसेच माहिती तंत्रज्ञान कायद्यांतर्गत गुन्हा दाखल करण्यात आला आहे.
पोलिसांच्या माहितीनुसार, आरोपीने स्वतःच्या नावाने बँक खाते उघडून ते सायबर गुन्हेगारी टोळीच्या वापरासाठी उपलब्ध करून दिले. या खात्यातून सुमारे २,७१,४२९.७० रुपये इतके व्यवहार झाल्याचे तपासात निष्पन्न झाले असून, या रकमेचा संबंध देशातील सात नागरिकांच्या सायबर फसवणुकीच्या तक्रारींशी असल्याचे समोर आले आहे.या प्रकरणाचा पुढील तपास पोलीस निरीक्षक पाटील करत आहेत.
