पिंपरी, दि.१९ जुलै: हिंजवडी पोलिसांनी अंमली पदार्थविरोधी पथकाच्या मदतीने मोठी कारवाई करत तब्बल ६ किलो ९९४ ग्रॅम अफू व डोडा चुरा (पॉपी स्ट्रॉ) जप्त केला. या प्रकरणी एका आरोपीला अटक करण्यात आली असून त्याच्याकडून ६ लाख ६८ हजार ६८० रुपयांचा मुद्देमाल जप्त करण्यात आला आहे.
पोलिसांनी दिलेल्या माहितीनुसार, १६ जुलै रोजी सायंकाळी सुमारे ४.१५ वाजण्याच्या सुमारास माण-हिंजवडी मार्गावरील अंबिका हार्डवेअर दुकानासमोर ही कारवाई करण्यात आली. या वेळी पोलिसांनी संशयित पप्पुराम भारमल चौधरी (वय ४३, रा. भरणेचाळ, माणगाव, हिंजवडी, पुणे) याला ताब्यात घेतले.
त्याच्या ताब्यातून ६ किलो ९९४ ग्रॅम अफू व डोडा चुरा (पॉपी स्ट्रॉ) जप्त करण्यात आला. या कारवाईत अंमली पदार्थासह इतर मिळून एकूण ६ लाख ६८ हजार ६८० रुपयांचा मुद्देमाल जप्त करण्यात आला आहे.
या प्रकरणी हिंजवडी पोलीस ठाण्यात अंमली पदार्थ प्रतिबंधक कायद्यान्वये गुन्हा दाखल करण्यात आला असून आरोपीकडे अंमली पदार्थांचा साठा कसा आला, तो कुठून आणला आणि कोणाला विक्रीसाठी ठेवला होता, याचा पोलीस अधिक तपास करत आहेत.
