पिंपरी-चिंचवड (प्रतिनिधी), : मोशी कचरा डेपो येथील ओला व सुका कचरा गोळा करून तो निगडी येथील अमरधाम स्मशानभूमीच्या पाठीमागील देहूरोड कॅन्टोन्मेंट बोर्डाच्या हद्दीतील जागेत टाकला जात असल्याचा आरोप करत भारतीय जनता पार्टीचे कार्यकर्ते सचिन काळभोर यांनी पिंपरी-चिंचवड महानगरपालिका प्रशासनाकडे तातडीने कारवाईची मागणी केली आहे.
याबाबत प्रसिद्धीस दिलेल्या निवेदनात काळभोर यांनी म्हटले आहे की, अमरधाम स्मशानभूमीत दररोज मोठ्या संख्येने नागरिक अंत्यसंस्कारासाठी येत असतात. तसेच परिसरातील सेक्टर २२ मधील रहिवाशांनाही या कचऱ्यामुळे उग्र दुर्गंधीचा सामना करावा लागत आहे. सध्या पावसाळ्यामुळे परिसरात घाणीचे साम्राज्य पसरत असून नागरिकांच्या आरोग्याचा प्रश्न गंभीर बनला आहे.
मोशी कचरा डेपोतील कचरा अमरधाम स्मशानभूमी परिसरात टाकणे तात्काळ बंद करावे व पर्यायी व्यवस्था करावी, अशी मागणी त्यांनी केली आहे.
या मागणीची दखल न घेतल्यास पिंपरी-चिंचवड महानगरपालिका आयुक्त कार्यालयासमोर कचरा टाकून तीव्र आंदोलन करण्यात येईल, असा इशाराही सचिन काळभोर यांनी प्रशासनाला दिला आहे.
