वारकरी महिलेचे दीड लाखांचे मंगळसूत्र हिसकावणाऱ्या दोन महिलांना रंगेहात पकडले; चोरीचा मुद्देमाल जप्त
पिंपरी-चिंचवड, दि.१० जुलै : श्री संत ज्ञानेश्वर महाराज पालखी सोहळ्यात वारकऱ्यांच्या गर्दीचा फायदा घेत सोन्याचे दागिने चोरणाऱ्या दोन महिलांना गुन्हे शाखा युनिट-३च्या पथकाने रंगेहात पकडत १ लाख ५० हजार रुपये किमतीचे १३ ग्रॅम वजनाचे सोन्याचे मिनी गंठण जप्त केले. पालखी सोहळ्यातील ही कारवाई पोलिसांच्या सतर्कतेचे उदाहरण ठरली आहे.
पोलीस आयुक्त विनयकुमार चौबे यांच्या सूचनेनुसार पालखी सोहळ्यात वारकऱ्यांच्या सोन्या-चांदीच्या दागिन्यांच्या चोरीला प्रतिबंध करण्यासाठी गुन्हे शाखा युनिट-३चे वरिष्ठ पोलीस निरीक्षक संतोष कसबे यांच्या नेतृत्वाखाली चार विशेष पथके तयार करण्यात आली होती. या पथकांमध्ये पोलीस उपनिरीक्षक सुनिल जावळे तसेच पोलीस अंमलदार सुरेखा बोरसे, बाबासाहेब गर्जे, सोमनाथ बोऱ्हाडे, दिलीप राठोड, निखील फापाळे आणि स्वप्नील महाले यांचा समावेश होता. ही पथके आळंदी ते बोपखेल फाटा दरम्यान वारकऱ्यांसोबत साध्या वेशात तैनात होती.
पालखी दिघी पोलीस ठाण्याच्या हद्दीत आल्यानंतर दर्शनासाठी आलेल्या एका महिला वारकरीच्या गळ्यातील मंगळसूत्र मागून आलेल्या दोन महिलांनी हिसकावले. मात्र, ही घटना पथकातील पोलीस अंमलदार दिलीप राठोड व स्वप्नील महाले यांच्या निदर्शनास येताच त्यांनी तात्काळ वरिष्ठ पोलीस निरीक्षक संतोष कसबे यांना सतर्क केले. पोलिसांनी तत्परता दाखवत दोन्ही महिलांना जागीच पकडले.
चौकशीत आरोपीचे नाव नयना विष्णू काळे (वय २०, रा. धारेगाव, मिटमिटा छावणी, संभाजीनगर) असे निष्पन्न झाले असून तिच्यासोबत एका विधीसंघर्षित अल्पवयीन मुलीचाही सहभाग असल्याचे समोर आले. त्यांच्या ताब्यातून चोरी केलेले १३ ग्रॅम वजनाचे, १ लाख ५० हजार रुपये किमतीचे सोन्याचे मिनी गंठण जप्त करण्यात आले.
या प्रकरणी फिर्यादी सुनिता नारायणराव राऊत (वय ५०, रा. चोली फाटा) यांच्या तक्रारीवरून दिघी पोलीस ठाण्यात गुन्हा क्रमांक ३१९/२०२६ भारतीय न्याय संहिता कलम ३०९(४) व ३(५) अन्वये गुन्हा दाखल करण्यात आला आहे.
ही उल्लेखनीय कारवाई पोलीस आयुक्त विनयकुमार चौबे, सहपोलीस आयुक्त डॉ. शशिकांत महावरकर, अपर पोलीस आयुक्त सारंग आवाड आणि सहायक पोलीस आयुक्त (गुन्हे) सुदर्शन साईदास राठोड यांच्या मार्गदर्शनाखाली वरिष्ठ पोलीस निरीक्षक संतोष कसबे यांच्या नेतृत्वात गुन्हे शाखा युनिट-३च्या पथकाने यशस्वीपणे पार पाडली.
