पिंपरी-चिंचवड, प्रतिनिधी : काळेवाडी परिसरात भरधाव स्कूटीच्या धडकेत एका पादचाऱ्याला गंभीर दुखापत झाल्याची घटना समोर आली आहे. या प्रकरणी अज्ञात स्कूटी चालकाविरुद्ध गुन्हा दाखल करण्यात आला आहे.
ही घटना दि. ७ जुलै २०२६ रोजी रात्री सुमारे १०.०० वाजण्याच्या सुमारास विजयनगर, काळेवाडी रोडवरील प्राथमिक आरोग्य केंद्राजवळ घडली. याप्रकरणी दि. ८ जुलै २०२६ रोजी दुपारी ३.०६ वाजता बालेवाडी पोलीस ठाण्यात गुन्हा क्रमांक २८९/२०२६ नोंद करण्यात आला आहे.
फिर्यादी अभिजीत राजू शिंगारे (वय ३२), व्यवसाय मॅरेज हॉल मालक, रा. गणेश कॉलनी, विजयनगर, काळेवाडी यांनी तक्रार दिली आहे.
पोलीसांनी दिलेल्या माहितीनुसार, फिर्यादी हे रस्त्याच्या कडेला पायी चालत असताना एका अज्ञात स्कूटी चालकाने त्यांच्या पाठीमागून जोरदार धडक दिली. या अपघातात फिर्यादी गंभीर जखमी झाले असून त्यांच्या मांडीच्या हाडाला गंभीर दुखापत झाल्याने शस्त्रक्रिया करण्याची वेळ आली आहे. अपघातानंतर संबंधित स्कूटी चालक घटनास्थळावरून पळून गेला.
या प्रकरणी बालेवाडी पोलीस ठाण्यात भारतीय न्याय संहिता कलम २८१, १२५(२)(ब) तसेच मोटार वाहन कायद्यातील कलम १८४ व १३४ अन्वये अज्ञात स्कूटी चालकाविरुद्ध गुन्हा दाखल करण्यात आला असून पुढील तपास पोलीस उपनिरीक्षक नाईकनिंबाळकर करीत आहेत.
