पुणे प्रतिनिधी…संतश्रेष्ठ श्री ज्ञानेश्वर महाराज आणि जगद्गुरू श्री तुकाराम महाराज यांच्या आषाढी वारी पालखी प्रस्थान सोहळ्यानिमित्त भाविकांच्या सोयीसाठी पुणे महानगर परिवहन महामंडळ (पीएमपीएमएल) यांनी विशेष बससेवेचे नियोजन केले आहे. पुणे शहर, उपनगरे तसेच राज्यभरातून आळंदी आणि देहू येथे येणाऱ्या लाखो भाविकांसाठी नियमित बससेवेसह जादा बसगाड्या चालविण्यात येणार आहेत.
५ जुलै ते ९ जुलै २०२६ या कालावधीत आळंदीसाठी स्वारगेट, महापालिका, हडपसर, पुणे स्टेशन, निगडी, भोसरी, हिंजवडी आणि चिंचवड येथून दररोज एकूण १७९ बसेस धावणार आहेत. ८ जुलै रोजी रात्री १२ वाजेपर्यंत आळंदीसाठी विशेष बससेवा उपलब्ध राहणार आहे.
देहूसाठीही ५ ते ९ जुलैदरम्यान पुणे स्टेशन, महापालिका आणि निगडी येथून नियमित व जादा मिळून ३१ बसेस चालविण्यात येणार असून, देहू-आळंदी मार्गावर १५ विशेष बसेस उपलब्ध करून देण्यात आल्या आहेत.
९ जुलै रोजी आळंदी येथून पालखी प्रस्थान असल्याने पहाटे २.३० वाजल्यापासून स्वारगेट, पुणे स्टेशन, हडपसर आणि महापालिका येथून आळंदीसाठी १८ जादा बसेस सोडण्यात येणार आहेत. तसेच सकाळी ५.३० वाजल्यापासून पुणे व पिंपरी-चिंचवड परिसरातील विविध स्थानकांवरून नियमित मार्गावरील १५० बसेस भोसरी व विश्रांतवाडीपर्यंत भाविकांच्या सेवेसाठी धावणार आहेत. गरजेनुसार (किमान ४० प्रवासी असल्यास) अतिरिक्त बसेसही उपलब्ध करून दिल्या जाणार आहेत.
११ जुलै रोजी दोन्ही पालख्यांचे हडपसर येथे दर्शनासाठी दुपारी १२ ते १ या वेळेत थांबणार असल्याने महात्मा गांधी स्थानकातून पुणे स्टेशन, वारजे माळवाडी, कोथरूड डेपो, निगडी, चिंचवड, आळंदी आदी ठिकाणांसाठी विशेष बससेवा उपलब्ध राहील. तसेच कात्रज-कोंढवा मार्गासाठी शिवरकर गार्डन येथून, तर मुंढवा, चंदननगर आणि वाघोलीसाठी मगरपट्टा येथून बससेवेची व्यवस्था करण्यात आली आहे.
पालखी सोलापूर व सासवड मार्गे पुढे रवाना झाल्यानंतर वाहतुकीची परिस्थिती पाहून बससेवा टप्प्याटप्प्याने पूर्ववत करण्यात येईल. दरम्यान, हडपसर ते सासवड दरम्यानचा दिवेघाट वाहतुकीसाठी बंद राहणार असल्याने या मार्गावरील बससेवा बोपदेव घाट मार्गे चालविण्यात येणार आहे. यासाठी ६० जादा बसेसचे नियोजन करण्यात आले आहे.
पीएमपीएमएलने सर्व भाविक व प्रवाशांना या विशेष बससेवेचा लाभ घेण्याचे आणि प्रशासनाला सहकार्य करण्याचे आवाहन केले आहे.
