पिंपरी, दि. ३ जुलै : पिंपरी-चिंचवड पोलीस आयुक्तालयाने अंमली पदार्थांविरोधातील मोहिमेत मोठी कारवाई करत १५६ गुन्ह्यांमध्ये जप्त करण्यात आलेले तब्बल २ कोटी ६४ लाख १३ हजार ७१० रुपये किमतीचे अंमली पदार्थ नियमानुसार जाळून नष्ट केले.
पोलीस आयुक्त विनयकुमार चौबे यांच्या आदेशानुसार केंद्र व राज्य शासनाच्या मार्गदर्शक सूचनांचे पालन करत अंमली पदार्थ विल्हेवाट समितीची स्थापना करण्यात आली होती. या समितीचे अध्यक्ष अपर पोलीस आयुक्त सारंग आवाड असून, पोलीस उपायुक्त (गुन्हे) रोहिदास पवार आणि पोलीस उपायुक्त संदीप आटोळे हे सदस्य आहेत.
दि. ३० जून २०२६ रोजी समितीच्या मार्गदर्शनाखाली रांजणगाव एमआयडीसी येथील Maharashtra Enviro Power Ltd. येथे प्रादेशिक न्यायसहाय्यक वैज्ञानिक प्रयोगशाळा, राज्य उत्पादन शुल्क विभाग आणि महाराष्ट्र प्रदूषण नियंत्रण मंडळाच्या प्रतिनिधींच्या उपस्थितीत जप्त अंमली पदार्थांची भट्टीत जाळून विल्हेवाट लावण्यात आली.
यामध्ये ३१५ किलो गांजा, ७६१ ग्रॅम एमडी, १२ किलो अफूची झाडे, ३०० ग्रॅम ब्राउन शुगर आणि १०९ किलो डुडा अशा विविध प्रकारच्या अंमली पदार्थांचा समावेश होता. या सर्व मुद्देमालाची एकूण किंमत २,६४,१३,७१० रुपये इतकी आहे.
ही कारवाई सहपोलीस आयुक्त शशिकांत महावरकर, अपर पोलीस आयुक्त सारंग आवाड, पोलीस उपायुक्त रोहिदास पवार, पोलीस उपायुक्त संदीप आटोळे, सहायक पोलीस आयुक्त प्रविण मोरे यांच्या मार्गदर्शनाखाली अंमली पदार्थ विरोधी पथकाचे वरिष्ठ पोलीस निरीक्षक महेश पाटील तसेच त्यांच्या पथकाने यशस्वीपणे पार पाडली.
अंमली पदार्थांच्या तस्करीविरोधात कठोर भूमिका घेत जप्त मुद्देमालाची कायदेशीर व पर्यावरणपूरक पद्धतीने विल्हेवाट लावण्याची ही कारवाई पिंपरी-चिंचवड पोलिसांच्या अंमली पदार्थविरोधी मोहिमेतील महत्त्वाचा टप्पा मानला जात आहे.
