पिंपरी-चिंचवड : पिंपरी-चिंचवड पोलिसांच्या दारूबंदी पथकाने अवैध शस्त्रांविरोधातील विशेष मोहिमेत चांगली कामगिरी करत रेकॉर्डवरील एका आरोपीकडून एक देशी पिस्तूल आणि एक जिवंत काडतूस जप्त केले आहे. या प्रकरणी चिखली पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, मंगळवारी (दि.३० जून) दारूबंदी पथकाचे पोलिस निरीक्षक भास्कर पुल्ली यांच्या मार्गदर्शनाखाली उपनिरीक्षक मोरे, पोलिस अंमलदार पलांडे तसेच पथकातील इतर कर्मचारी पिंपरी-चिंचवड हद्दीत अवैध धंदे व शस्त्र बाळगणाऱ्यांविषयी माहिती घेत होते. त्यावेळी पोलिस शिपाई खेडकर आणि पोलिस नाईक गोनटे यांना मिळालेल्या गोपनीय माहितीच्या आधारे चिखली परिसरात सापळा रचून कारवाई करण्यात आली.
या कारवाईत शिवाजी दुर्गेश कुंचिकर (वय २०, रा. शिवाजीनगर, मरीमाता मंदिराजवळ, देहूरोड, ता. हवेली, जि. पुणे) याला ताब्यात घेण्यात आले. त्याच्याकडून सुमारे ५० हजार रुपये किमतीचे एक पिस्तूल आणि एक हजार रुपये किमतीचे एक जिवंत काडतूस असा एकूण ५१ हजार रुपयांचा मुद्देमाल जप्त करण्यात आला.
ही कारवाई चिखली गाव हद्दीतील जाधववाडी ते जाधव सरकार चौक मार्गावरील महानगरपालिकेच्या मोकळ्या जागेजवळ करण्यात आली. आरोपीविरुद्ध चिखली पोलीस ठाण्यात गुन्हा क्रमांक ४४७/२०२६ अन्वये भारतीय शस्त्र कायदा कलम ३(२५) तसेच महाराष्ट्र पोलीस अधिनियमातील संबंधित कलमांनुसार गुन्हा दाखल करण्यात आला असून पुढील तपास सुरू आहे.
