पिंपरी प्रतिनिधी : पिंपरी-चिंचवड पोलीस आयुक्तालयातील नियत वयोमानानुसार सेवानिवृत्त झालेल्या सात पोलीस अधिकारी व अंमलदारांचा सन्मानपूर्वक सत्कार आणि निरोप समारंभ मंगळवारी (दि. ३० जून) पोलीस आयुक्तालयातील ‘शिवनेरी हॉल’ येथे आयोजित करण्यात आला.
पोलीस आयुक्त विनय कुमार चौबे यांच्या मार्गदर्शनाखाली झालेल्या या कार्यक्रमाला पोलीस सहआयुक्त शशिकांत महावरकर, अपर पोलीस आयुक्त सारंग आवाड आणि पोलीस उपआयुक्त (मुख्यालय) गणेश इंगळे प्रमुख उपस्थित होते.
या वेळी सेवानिवृत्त झालेले सहायक पोलीस आयुक्त सतीश विठ्ठलराव नांदुरकर (वाहतूक विभाग), सहायक पोलीस आयुक्त दीपक रामदास साळुंके (अभियान), पोलीस निरीक्षक शंकर रामभाऊ डामसे (वाहतूक विभाग), श्रेणी पोलीस उपनिरीक्षक शांताराम शिवाजी उभे (वाहतूक विभाग), श्रेणी पोलीस उपनिरीक्षक रामदास बापू नरवडे (चिंचवड पोलीस ठाणे), सहायक पोलीस उपनिरीक्षक उन्मेश अनंत जोशी (बिनतारी संदेश विभाग) आणि पोलीस हवालदार राजू त्रिंबक केदारी (पोलीस मुख्यालय) यांचा त्यांच्या कुटुंबीयांसह शाल, श्रीफळ, पुष्पगुच्छ, स्मृतिचिन्ह, सेवानिवृत्ती प्रमाणपत्र, ओळखपत्र, शुभेच्छापत्र, झाडाचे रोपटे आणि भेटवस्तू देऊन सत्कार करण्यात आला.
यावेळी उपस्थित मान्यवरांनी सेवानिवृत्त अधिकारी व कर्मचाऱ्यांच्या पोलीस दलातील उल्लेखनीय सेवेला गौरवून त्यांच्या निरोगी, आनंदी आणि यशस्वी पुढील आयुष्यासाठी शुभेच्छा दिल्या.
समारंभास वरिष्ठ पोलीस निरीक्षक संजय नरावाड, सहायक पोलीस निरीक्षक राकेश भामरे, सेवानिवृत्त अधिकारी-अंमलदार, त्यांचे कुटुंबीय तसेच पिंपरी-चिंचवड पोलीस आयुक्तालयातील अधिकारी व कर्मचारी मोठ्या संख्येने उपस्थित होते.
