मुंबईत १० ते १२ जुलैदरम्यान नगरसेवकांसाठी विशेष प्रशिक्षण शिबिर
पिंपरी, दि. ३० जून : पिंपरी-चिंचवड महानगरपालिकेतील भाजप नगरसेवकांमध्ये पक्षशिस्तीचा मुद्दा पुन्हा ऐरणीवर आला असून, पक्षाच्या अधिकृत भूमिकेविरोधात भूमिका घेणाऱ्या नगरसेवकांवर कठोर पक्षांतर्गत कारवाई करण्यात येणार असल्याचा स्पष्ट इशारा सत्तारूढ पक्षनेते प्रशांत शितोळे यांनी दिला आहे.
कोअर कमिटीच्या बैठकीत पक्षशिस्तीच्या मुद्द्यावर सविस्तर चर्चा झाल्याचे सांगताना शितोळे म्हणाले की, काही नगरसेवकांकडून पक्षाच्या अधिकृत भूमिकेपासून विचलित होत स्वतंत्र भूमिका घेतली जात असल्याबाबत वरिष्ठ नेतृत्वाने तीव्र नाराजी व्यक्त केली आहे. यापुढे अशा प्रकाराला कोणतीही मुभा दिली जाणार नाही.
महापालिकेच्या सर्वसाधारण सभेत पक्षाची भूमिका एकच असावी आणि प्रत्येक नगरसेवकाने पक्षाच्या निर्णयानुसारच मतदान व भूमिका मांडावी, असे स्पष्ट निर्देश देण्यात आले आहेत. पदाधिकाऱ्यांच्या निर्णयाच्या विरोधात जाणे, सभागृहात वेगळी भूमिका घेणे किंवा माध्यमांसमोर पक्षाच्या भूमिकेशी विसंगत वक्तव्य करणे हे पक्षशिस्तीचे उल्लंघन मानले जाईल, असेही त्यांनी स्पष्ट केले.
पक्षशिस्त मोडणाऱ्या नगरसेवकांवर टप्प्याटप्प्याने कारवाई केली जाईल. गरज पडल्यास संबंधितांची पक्षश्रेष्ठींकडे तक्रार पाठविणे, पदावरील जबाबदाऱ्या काढून घेणे तसेच पक्षाच्या नियमांनुसार शिस्तभंगाची पुढील कारवाई करण्याचाही इशारा शितोळे यांनी दिला. पक्षात समन्वय, शिस्त आणि एकसंघ भूमिका राखणे अत्यंत आवश्यक असल्याचेही त्यांनी नमूद केले.
दरम्यान, नगरसेवकांना सभागृहाचे कामकाज, अधिकार, जबाबदाऱ्या आणि स्थानिक स्वराज्य संस्थांच्या नियमांची माहिती देण्यासाठी रामभाऊ माळगी प्रबोधिनीच्या माध्यमातून १० ते १२ जुलै २०२६ या कालावधीत मुंबई येथे विशेष प्रशिक्षण शिबिर आयोजित करण्यात आले आहे. या प्रशिक्षणात सर्व नगरसेवकांनी अनिवार्यपणे सहभागी व्हावे, असे आवाहनही प्रशांत शितोळे यांनी केले.
