पिंपरी, दि. १ जुलै : सिक्युरिटी व्यवसाय बंद पाडण्याची तसेच जीवे मारण्याची धमकी देत खंडणी उकळणाऱ्या रेकॉर्डवरील आरोपीला पिंपरी-चिंचवड गुन्हे शाखेच्या खंडणीविरोधी पथकाने सापळा रचून रंगेहाथ अटक केली. आरोपीकडून एकूण ११ लाख ६ हजार रुपयांचा मुद्देमाल जप्त करण्यात आला असून त्याच्याविरुद्ध दिघी पोलीस ठाण्यात खंडणीचा गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी श्रीकांत शामराव बाबर (वय ४४, रा. नवी सांगवी) यांनी खंडणीविरोधी पथकाकडे तक्रार दिली. आरोपी मसना ऊर्फ महेश सखाराम शिरोळे (वय २८, रा. मेदनकरवाडी, ता. खेड, जि. पुणे) याने फिर्यादी व त्यांच्या कंपनीचे सुपरवायझर संदीप कणसे यांना मोबाईलवरून वारंवार संपर्क साधून सिक्युरिटी व्यवसाय सुरू ठेवायचा असेल तर सुरुवातीला १० लाख, त्यानंतर ८ लाख, ७ लाख आणि अखेरीस ६ लाख रुपये द्यावे लागतील, अन्यथा जीवे मारून टाकण्याची धमकी दिली होती.
तक्रारीनंतर खंडणीविरोधी पथकाने सापळा रचला. ठरल्याप्रमाणे ३ लाख रुपयांची खंडणी देण्याचे नाटक करण्यात आले. यासाठी काही खऱ्या नोटांसह डमी नोटांचा वापर करून बनावट रकमेचे बंडल तयार करण्यात आले.
दि. ३० जून २०२६ रोजी सायंकाळी मॅक्झिन चौक, आळंदी-पुणे रोड, दिघी येथील स्वच्छतागृहाजवळ आरोपी महेश शिरोळे हा ३ लाख रुपयांची खंडणी स्वीकारताना पोलिसांनी रंगेहाथ पकडला. या कारवाईत आरोपीकडून एकूण ११ लाख ६ हजार रुपयांचा मुद्देमाल जप्त करण्यात आला.
या प्रकरणी दिघी पोलीस ठाणे गुन्हा क्रमांक ३११/२०२६ अंतर्गत भारतीय न्याय संहिता, २०२३ कलम ३०८(२) व ३०८(५) अन्वये गुन्हा दाखल करण्यात आला असून आरोपी व जप्त मुद्देमाल पुढील तपासासाठी दिघी पोलीस ठाण्याच्या ताब्यात देण्यात आला आहे.
ही कारवाई पोलीस आयुक्त विनयकुमार चौबे, सहपोलीस आयुक्त डॉ. शशिकांत महावरकर, अपर पोलीस आयुक्त (गुन्हे) सारंग आव्हाड, पोलीस उपआयुक्त (गुन्हे) रोहिदास पवार आणि सहायक पोलीस आयुक्त प्रवीण मोरे यांच्या मार्गदर्शनाखाली खंडणीविरोधी पथकाचे वरिष्ठ पोलीस निरीक्षक राजेंद्र पाटील व त्यांच्या पथकाने यशस्वीरीत्या पार पाडली.
