पिंपरी, दि. १ जुलै : जगदगुरु श्री संत तुकाराम महाराज यांच्या ३४१ व्या आषाढी वारी-२०२६ पालखी प्रस्थान सोहळ्याच्या पार्श्वभूमीवर पिंपरी-चिंचवडचे पोलीस आयुक्त विनयकुमार चौबे यांनी बुधवारी श्रीक्षेत्र देहू येथील मंदिर परिसर तसेच संपूर्ण पालखी मार्गाची प्रत्यक्ष पाहणी केली. ७ जुलै रोजी होणारा पालखी प्रस्थान सोहळा शांततेत, सुरक्षित आणि निर्विघ्न वातावरणात पार पडावा, यासाठी संबंधित यंत्रणांना आवश्यक सूचना देण्यात आल्या.
देहू येथील मंदिर परिसराची पाहणी करताना पोलीस आयुक्तांनी जगदगुरु श्री संत तुकाराम महाराज मंदिर संस्थान कार्यालयाला भेट देऊन संस्थानचे अध्यक्ष जालिंदर विश्वनाथ मोरे महाराज, विश्वस्त गणेश उत्तम मोरे यांच्यासह पदाधिकाऱ्यांशी चर्चा केली. पालखी सोहळ्यादरम्यान गर्दी व्यवस्थापन, कायदा व सुव्यवस्था आणि वारकऱ्यांच्या सुरक्षिततेबाबत विविध मुद्द्यांवर चर्चा झाली. तसेच दर्शनबारीतील गर्दी नियंत्रणासाठी योग्य बॅरिकेडिंग व दोरांचा वापर करण्याच्या सूचना संबंधित अधिकाऱ्यांना देण्यात आल्या.
यावेळी नव्याने तयार करण्यात येणाऱ्या पालखी रथाचीही पाहणी करण्यात आली. संस्थानच्या वतीने पोलीस आयुक्तांसह वरिष्ठ पोलीस अधिकाऱ्यांचा सत्कार करण्यात आला.
पोलीस आयुक्तांनी अनगडशहाबाबा दर्गा आणि चिंचोली गाव येथील श्री शनि मंदिर या पालखी मार्गावरील विसाव्याच्या ठिकाणांचीही पाहणी केली. निगडीतील भक्तीशक्ती चौक ते मोरवाडी चौक या मार्गावर सुरू असलेल्या पुणे मेट्रोच्या कामामुळे निर्माण झालेल्या अडथळ्यांची दखल घेत मेट्रो अधिकाऱ्यांना बॅरिकेडिंग मागे घेणे, संरक्षक जाळ्या उभारणे, राडारोडा हटवून रस्ता समतल करणे आदी उपाययोजना तातडीने करण्याच्या सूचना देण्यात आल्या.
तसेच पिंपरी-चिंचवड महानगरपालिकेच्या अधिकाऱ्यांना पालखी मार्ग रुंद करण्यासाठी रस्त्यालगतचा राडारोडा हटविणे, झाडांच्या अडथळा ठरणाऱ्या फांद्या छाटणे तसेच मार्गातील कमानी हटविण्याबाबत निर्देश देण्यात आले.
या पाहणीवेळी पोलीस सहआयुक्त डॉ. शशिकांत महावरकर, अपर पोलीस आयुक्त सारंग आवाड, बसवराज तेली, विविध विभागांचे पोलीस उपायुक्त, पिंपरी-चिंचवड महानगरपालिकेचे अतिरिक्त आयुक्त कुलदीप जंगम, उपायुक्त प्रदीप ठेंगल तसेच महामेट्रोचे रेसिडेंट इंजिनिअर यतेंद्र कुलकर्णी उपस्थित होते.
