पिंपरी, दि. १ जुलै २०२६ : पिंपरी-चिंचवड महानगरपालिकेच्या स्थायी समितीची साप्ताहिक बैठक बुधवारी मुख्य प्रशासकीय इमारतीतील दिवंगत महापौर मधुकरराव पवळे सभागृहात पार पडली. स्थायी समितीचे सभापती अभिषेक बारणे यांच्या अध्यक्षतेखाली झालेल्या बैठकीत आरोग्य, शिक्षण, पायाभूत सुविधा, पर्यावरण, अग्निसुरक्षा आणि सामाजिक कल्याणाशी संबंधित विविध महत्त्वपूर्ण विषयांना मंजुरी देण्यात आली.
बैठकीनंतर सभापती अभिषेक बारणे यांनी सांगितले की, महाराष्ट्र शासनाकडून महानगरपालिकेला मंजूर झालेल्या पाच कोटी रुपयांच्या निधीतून मराठी शाळांची दर्जोन्नती, आरोग्य साहित्य खरेदी, महिलांसाठी आरोग्यविषयक सुविधा तसेच पर्यावरण आणि पर्यटनविषयक उपक्रम राबविण्यात येणार आहेत. तसेच ‘हिंदुहृदयसम्राट बाळासाहेब ठाकरे नागरी लोककल्याणकारी’ योजना प्रभावीपणे राबविण्यात येणार असल्याचेही त्यांनी स्पष्ट केले.
बैठकीस आयुक्त डॉ. विजय सूर्यवंशी, अतिरिक्त आयुक्त कुलदीप जंगम, तृप्ती सांडभोर, विक्रांत बगाडे, नगरसचिव मुकेश कोळप, स्थायी समितीचे सदस्य तसेच विविध विभागांचे प्रमुख अधिकारी उपस्थित होते.
बैठकीत महापालिकेच्या रुग्णालयांसाठी आयुष्मान भारत आणि महात्मा ज्योतिराव फुले जनआरोग्य योजनेअंतर्गत आवश्यक औषधे, उपभोग्य साहित्य आणि ऑर्थोपेडिक साहित्य खरेदीस मंजुरी देण्यात आली. विविध प्रकारच्या औषधांच्या खरेदीलाही हिरवा कंदील देण्यात आला.
मोरवाडी येथील औद्योगिक प्रशिक्षण विभागांतर्गत एमएस-सीआयटी उपकेंद्रांना मान्यता देण्यात आली. या माध्यमातून महिला, अनुसूचित जाती-जमाती व भटक्या जमातीतील लाभार्थ्यांना केवळ १० टक्के शुल्कात, तर ४० टक्क्यांपेक्षा अधिक दिव्यांगत्व असलेल्या लाभार्थ्यांना ५ टक्के शुल्कात संगणक प्रशिक्षण उपलब्ध होणार आहे.
झोपडपट्टी भागातील सेवाशुल्क बिले वाटप आणि जनजागृतीचे काम महिला बचत गटांकडे सोपविण्याचा निर्णय घेण्यात आला असून, त्यामुळे महिलांना रोजगाराच्या संधी उपलब्ध होणार आहेत. तसेच प्रभाग क्रमांक २० मधील सार्वजनिक शौचालयांच्या साफसफाईच्या कामास मुदतवाढ देण्यात आली.
याशिवाय रावेत येथील एक्सप्रेस फिडरवर अखंड वीजपुरवठ्यासाठी स्वयंचलित यंत्रणा बसविणे, ‘ब’ क्षेत्रीय कार्यालयांतर्गत जलनिःसारणाची कामे, सांगवी स्मशानभूमीतील गॅस शवदाहिनीची दुरुस्ती व देखभाल तसेच जलशुद्धीकरण केंद्र आणि पंप हाऊस येथे अत्याधुनिक अग्निशामक उपकरणे बसविण्याच्या कामांनाही मंजुरी देण्यात आली.
सभापती अभिषेक बारणे यांनी सांगितले की, स्थायी समितीचे निर्णय नागरिकांच्या हिताला प्राधान्य देणारे असून आरोग्य, शिक्षण आणि मूलभूत सुविधा अधिक सक्षम करण्यासाठी महापालिका कटिबद्ध आहे. या निर्णयांची वेळेत अंमलबजावणी झाल्यास पिंपरी-चिंचवडच्या सर्वांगीण विकासाला मोठी चालना मिळेल, असा विश्वास त्यांनी व्यक्त केला.
