पिंपरी, दि.०१ जूलै २०२६ : भारत निवडणूक आयोगाच्या निर्देशानुसार २०६ पिंपरी (अ.जा.) विधानसभा मतदारसंघात मतदार यादी अधिक अचूक व अद्ययावत करण्यासाठी विशेष सखोल पुनरीक्षण (Special Intensive Revision – SIR) मोहिमेला ३० जूनपासून प्रारंभ झाला आहे. या मोहिमेंतर्गत मतदारसंघातील ३९८ बूथ लेव्हल ऑफिसर (BLO) घराघरांत जाऊन मतदारांची माहिती पडताळणार असून ‘एन्युमरेशन फॉर्म (EF)’ वाटप व संकलनाचे काम करणार आहेत.
या मोहिमेच्या पूर्वतयारीचा भाग म्हणून अधिकारी व कर्मचाऱ्यांचे प्रशिक्षण, ईएफ फॉर्मची छपाई, बीएलओंना साहित्य वाटप आदी कामे २९ जूनपर्यंत पूर्ण करण्यात आली. तसेच राष्ट्रीय व राज्यस्तरीय राजकीय पक्षांच्या प्रतिनिधींच्या बैठका घेऊन मोहिमेची माहिती देण्यात आली असून प्रत्येक मतदान केंद्रावर बीएलए-२ नियुक्त करण्याचे आवाहनही करण्यात आले आहे.
मोहिमेचे वेळापत्रक….
🔴३० जून ते २९ जुलै २०२६: बीएलओमार्फत घराघरांत जाऊन ईएफ फॉर्मचे वाटप व संकलन.
🔴५ ऑगस्ट २०२६: प्रारूप मतदार यादी प्रसिद्ध.
🔴५ ऑगस्ट ते ४ सप्टेंबर २०२६: दावे व हरकती स्वीकारण्याचा कालावधी.
🔴५ ऑगस्ट ते ३ ऑक्टोबर २०२६: दावे-हरकतींवर सुनावणी.
🔴७ ऑक्टोबर २०२६: अंतिम मतदार यादी प्रसिद्ध.
पिंपरी विधानसभा मतदारसंघात ३९८ मतदान केंद्रे असून एकूण ४,०१,९७५ मतदार नोंदणीकृत आहेत. त्यामध्ये २,०८,६५३ पुरुष, १,९३,२८३ महिला आणि ३९ इतर मतदार आहेत. २९ जूनपर्यंत सुमारे २,०४,२९३ (५१ टक्के) मतदारांचे २००२ च्या मतदार यादीशी मॅपिंग/प्रोजेनीचे काम पूर्ण झाले असून उर्वरित प्रक्रिया या मोहिमेत पूर्ण केली जाणार आहे.
मोहिमेच्या प्रभावी अंमलबजावणीसाठी २३ सहाय्यक मतदार नोंदणी अधिकारी (AERO), ३९८ बीएलओ, ४० नोडल अधिकारी, प्रगणक, ग्राम महसूल अधिकारी, सेक्टर अधिकारी आणि १० पर्यवेक्षक नियुक्त करण्यात आले आहेत. तसेच स्वयंसेवी संस्था आणि महिला बचत गटांचीही मदत घेतली जात आहे.
श्री. जयराज देशमुख (अपर तहसीलदार) आणि श्री. अभिजीत केंद्रेकर (निवडणूक नायब तहसीलदार) हे सहाय्यक मतदार नोंदणी अधिकारी म्हणून मोहिमेवर थेट नियंत्रण ठेवत आहेत.
मतदार नोंदणी अधिकारी श्रीमती अर्चना यादव यांनी नागरिकांना आवाहन केले आहे की, आपल्या कुटुंबातील पात्र मतदारांची नोंदणी आणि माहिती अद्ययावत असल्याची खात्री करून घरात येणाऱ्या बीएलओंना आवश्यक माहिती व कागदपत्रे उपलब्ध करून द्यावीत. नागरिकांनी ECINET ॲपद्वारे किंवा संबंधित बीएलओशी संपर्क साधूनही माहिती मिळवू शकतात.
