पिंपरी-चिंचवड, दि. २ जुलै : काळेवाडी परिसरात घराच्या वाटणीच्या वादातून चुलत्याने पुतण्याच्या डोक्यात लोखंडी रॉडने वार करून त्याचा खून केल्याची धक्कादायक घटना उघडकीस आली आहे. या प्रकरणी काळेवाडी पोलिसांनी आरोपीला अटक केली आहे.
पोलिसांनी दिलेल्या माहितीनुसार, ही घटना १ जुलै रोजी सकाळी ११.४० ते दुपारी २.०० या वेळेत कृष्णा गार्डन सोसायटी, सी विंग, फ्लॅट क्रमांक १९, जीवन चौक, काळेवाडी येथे घडली. याप्रकरणी रोशन ऊर्फ मयूर राजेंद्र पाखरे (वय २९, रा. पाचपीर चौकाजवळ, काळेवाडी) यांनी फिर्याद दिली आहे.
फिर्यादीनुसार, आरोपी संजय उमाजी पाखरे (वय ६२) यांचा घराच्या वाटणीवरून तसेच कुटुंबातील इतर कारणांवरून राग होता. त्याच रागाच्या भरात त्यांनी फिर्यादीचा भाऊ गणेश राजेंद्र पाखरे (वय ३२) यांच्या डोक्यात लोखंडी रॉडने जोरदार वार करून त्यांचा खून केला.
या प्रकरणी काळेवाडी पोलीस ठाण्यात गुन्हा क्रमांक २८१/२०२६ अन्वये भारतीय न्याय संहिता कलम १०३(१) अंतर्गत गुन्हा दाखल करण्यात आला असून आरोपी संजय उमाजी पाखरे याला अटक करण्यात आली आहे.या गुन्ह्याचा पुढील तपास पोलीस निरीक्षक (गुन्हे) धुमाळे यांच्या मार्गदर्शनाखाली सुरू आहे.
