८५ टक्के दिव्यांग प्रमाणपत्रापासून संजय गांधी निराधार योजनेपर्यंत मदत; डॉक्टरांनीही उचलला सीटी स्कॅन व औषधांचा खर्च
मालवण, प्रतिनिधी …ह्युमन राईट असोसिएशन फॉर प्रोटेक्शन, कोकण विभाग-सिंधुदुर्गच्या माध्यमातून दिव्यांग कुमार प्रथमेश सत्यविजय मार्गी (मु.पो. कट्टा, ता. मालवण, जि. सिंधुदुर्ग) याला गेल्या काही वर्षांत महत्त्वाची शासकीय व वैद्यकीय मदत मिळवून देण्यात आली आहे. संघटनेच्या पदाधिकाऱ्यांनी सातत्याने केलेल्या पाठपुराव्यामुळे प्रथमेशला ८५ टक्के दिव्यांग प्रमाणपत्र मिळाले असून, त्याचबरोबर संजय गांधी निराधार पेन्शन योजना देखील मंजूर करून देण्यात आली आहे.
सुमारे पाच वर्षांपूर्वी कोकण विभागीय अध्यक्ष संतोष नाईक यांच्या मार्गदर्शनाखाली जिल्हा महिला संघटक सौ. मीनल पार्टे आणि मालवण तालुका ग्रामीण महिला संघटक सौ. सीमा धुरी यांनी प्रथमेशच्या कुटुंबासाठी शासन दरबारी पाठपुरावा सुरू केला होता. त्यांच्या प्रयत्नांमुळे प्रथमेशला दिव्यांग प्रमाणपत्र मिळाले आणि त्यानंतर प्रथमेश व त्याच्या आईसाठी संजय गांधी निराधार योजनेचा लाभही मंजूर झाला.
दरम्यान,११ जून २०२६ रोजी संतोष नाईक यांच्या मार्गदर्शनानुसार जिल्हा महिला संघटक सौ. मीनल पार्टे यांनी प्रथमेशला पडवे येथील एसएसपीएम हॉस्पिटलमध्ये नेऊन मानसोपचार तज्ज्ञ डॉ. अंबापुरकर यांच्याकडून वैद्यकीय तपासणी करून घेतली. यावेळी प्रथमेशच्या घरची आर्थिक व सामाजिक परिस्थिती सौ. पार्टे यांनी डॉक्टरांसमोर मांडली. त्यानंतर डॉ. अंबापुरकर यांनी प्रथमेशच्या सीटी स्कॅनसाठी लागणारा 8 हजार रुपयांचा खर्च तसेच त्याच्या पुढील औषधोपचाराचा खर्च स्वतः उचलण्याचा निर्णय घेतला.
याशिवाय, डॉ. अंबापुरकर यांनी एसएसपीएम हॉस्पिटलच्या स्टाफसमोर मानव अधिकार संघटनेच्या कार्याचे महत्त्वही स्पष्ट केले. तसेच ह्युमन राईट असोसिएशन फॉर प्रोटेक्शन, कोकण विभाग-सिंधुदुर्गच्या सर्व पदाधिकारी व सदस्यांच्या कार्याचे कौतुक करून पुढील सामाजिक उपक्रमांसाठी शुभेच्छा दिल्या.
या मदतीबद्दल संघटनेच्या वतीने सौ. मीनल पार्टे यांनी डॉ. अंबापुरकर यांचे आभार मानले. प्रथमेशसारख्या गरजू दिव्यांग मुलासाठी संघटनेच्या माध्यमातून उभा राहिलेला हा मदतीचा हात समाजातील संवेदनशीलतेचे उदाहरण ठरत आहे.या कार्याबद्दल सौ. मीनल पार्टे आणि सौ. सीमा धुरी यांचे विविध स्तरांतून अभिनंदन होत आहे.
