देहूरोड दि.१९ मे….किवळे विकासनगर येथील ज्येष्ठ नागरिक संघाच्या वतीने रविवारी (दि. १७ मे) आयोजित करण्यात आलेल्या “मेरी आवाज सुनो” या संगीत कार्यक्रमाला उत्स्फूर्त प्रतिसाद मिळाला. कार्यक्रमास नगरसेवक राजेंद्र तरस यांची प्रमुख उपस्थिती होती.
संगीत दिग्दर्शक श्री एम. डी. चौधरी आणि श्री रवि कुलकर्णी यांच्या मार्गदर्शनाखाली आयोजित या कार्यक्रमात संघातील ज्येष्ठ नागरिकांनी विविध मराठी व हिंदी गीते सादर करत उपस्थितांचे मनोरंजन केले. “चांदण्याची छाया”, “किसी राह में किसी मोड पर”, “रामा रघुनंदना”, “चली जा रहे है उमर धीरे धीरे”, “शरद सुंदर”, “भले बुरे जे घडून गेले”, “बेकरार करके हमने”, “ओमकार प्रधान”, “जिंदगी हसने गाने के लिये”, “तोबा है मतवाली चाल” यांसह तब्बल १८ गाण्यांचे सादरीकरण करण्यात आले. प्रत्येक गीताला प्रेक्षकांनी उत्स्फूर्त दाद दिली.
यावेळी नगरसेवक राजेंद्र तरस यांनी गेल्या चार महिन्यांत प्रभागात राबविण्यात आलेल्या विविध विकासकामांची माहिती दिली. तसेच रस्ते, नागरी समस्या आणि ज्येष्ठ नागरिकांसाठी उपलब्ध शासकीय योजनांबाबत मार्गदर्शन केले.
कार्यक्रमास संघाचे अध्यक्ष नानासाहेब डोईफोडे, सचिव पंढरीनाथ सानप, मच्छिंद्र कदम, माणिक एकड, गफूर भाई शेख, दिलीप रोकडे, विश्वास आंबेकर, गजानन ठाणे, रवींद्र कदम, सौ. सुरेखा वाघ यांच्यासह मोठ्या संख्येने ज्येष्ठ नागरिक उपस्थित होते.
