भोसरी भाजपमधील अंतर्गत संघर्ष चव्हाट्यावर; संभाजीनगरात कार्यकर्त्यांसमोर शाब्दिक राडा
पिंपरी चिंचवड, दि. १८ मे २०२६ : भोसरी विधानसभा मतदारसंघातील भाजपमधील अंतर्गत नाराजी अखेर उघडपणे रस्त्यावर आली असून माजी महापौर मंगलाताई कदम यांनी आमदार महेशदादा लांडगे यांना भररस्त्यात थांबवत तीव्र शब्दांत जाब विचारल्याने राजकीय वर्तुळात मोठी खळबळ उडाली आहे. संभाजीनगर येथील साई गार्डन परिसरात हा संपूर्ण प्रकार घडला.
संभाजीनगर परिसरात असंघटित कामगार, हातगाडी, पथारी व भाजी विक्रेते यांच्या वतीने कामगार नेते काशिनाथ नखाते यांनी कामगार मेळाव्याचे आयोजन केले होते. या कार्यक्रमात श्रम प्रतिष्ठा पुरस्कार, विविध सन्मान तसेच विद्यार्थ्यांना शिष्यवृत्ती वितरण करण्यात आले. कार्यक्रमासाठी आमदार महेश लांडगे प्रमुख पाहुणे म्हणून उपस्थित होते.
कार्यक्रम संपल्यानंतर बाहेर पडत असताना माजी महापौर मंगलाताई कदम यांनी कार्यकर्त्यांसह आमदार लांडगे यांना रस्त्यात अडवले. प्रभाग क्रमांक ११ मधील कामांमध्ये स्थानिक नगरसेवक अडथळे निर्माण करीत असल्याचा आरोप करत त्यांनी तीव्र नाराजी व्यक्त केली. “दादा, तुमच्यासाठी आम्ही विलास लांडे यांना पाडलं आणि तुम्हाला निवडून दिलं,” असे म्हणत त्यांनी मोठ्या आवाजात भावना व्यक्त केल्याचे प्रत्यक्षदर्शींनी सांगितले.
दरम्यान, नगरसेवक निलेश नेवाळे आणि मंगलाताई कदम यांच्यात जोरदार शाब्दिक खडाजंगी झाली. दोन्ही बाजूंचे शेकडो कार्यकर्ते रस्त्यावर जमा झाल्याने परिसरात काही काळ तणावपूर्ण वातावरण निर्माण झाले. कार्यकर्त्यांच्या मध्यस्थीनंतर परिस्थिती नियंत्रणात आली.
यावेळी प्रभागातील चारही नगरसेवकांविरोधात तसेच भाजपविरोधात घोषणाबाजी करण्यात आली. आमदारांचे पत्र असूनही स्थानिक नगरसेवक संबंधित कामात ढवळाढवळ करीत असून कामे होऊ देत नसल्याचा थेट आरोपही मंगलाताई कदम यांनी केला.
घटनास्थळी उपस्थित काही माध्यम प्रतिनिधींनी या संपूर्ण प्रकाराचे चित्रीकरण करण्याचा प्रयत्न केला. मात्र, व्हिडिओ शूटिंग करण्यास मज्जाव करण्यात आल्याचा आरोप पत्रकारांकडून करण्यात आला. पत्रकारांच्या वार्तांकनाच्या कामात अडथळा आणल्याबद्दलही माध्यम प्रतिनिधींनी नाराजी व्यक्त केली. माध्यमांचे कॅमेरे सुरू असल्याचे लक्षात येताच संबंधित लोकप्रतिनिधींनी तेथून निघून जाणे पसंत केल्याचे उपस्थितांनी सांगितले.
या घटनेमुळे भोसरी भाजपमधील अंतर्गत मतभेद पुन्हा एकदा चव्हाट्यावर आले असून आगामी स्थानिक राजकारणात त्याचे पडसाद उमटण्याची शक्यता व्यक्त केली जात आहे.
