रस्ते, आरोग्य सुविधा आणि खेळाडूंना आर्थिक साहाय्य
पिंपरी-चिंचवड, : पिंपरी-चिंचवड महानगरपालिकेच्या स्थायी समितीच्या सभेत शहरातील विविध विकासकामे, रस्ते, आरोग्य सेवा आणि नागरी सुविधांच्या प्रस्तावांना मंजुरी देण्यात आली. सभापती अभिषेक बारणे यांच्या अध्यक्षतेखाली महापालिकेच्या प्रशासकीय इमारतीत ही सभा पार पडली.
महानगरपालिकेच्या क्रीडा धोरणानुसार आंतरराष्ट्रीय स्पर्धांमध्ये सहभागी होणाऱ्या खेळाडूंना आर्थिक साहाय्य व क्रीडा शिष्यवृत्ती देण्यास मान्यता देण्यात आली. यामध्ये इजिप्त, सिंगापूर, हाँगकाँग आणि आशियाई पॉवरलिफ्टिंग स्पर्धांसाठी खेळाडूंना मदत करण्यात येणार आहे.
शहरातील विविध प्रभागांमध्ये रस्त्यांचे डांबरीकरण, हॉटमिक्स पद्धतीने दुरुस्ती, नाल्यांची दुरुस्ती, स्टॉर्म वॉटर लाईन आणि नागरी सुविधांच्या कामांना मंजुरी मिळाली. चिखलीतील गृहप्रकल्पातील उर्वरित कामे तसेच जुनी सांगवी येथील नाल्याच्या प्रवाहाची दिशा बदलून घाट परिसराचे सुशोभीकरण करण्याच्या प्रस्तावालाही मान्यता देण्यात आली.
महापालिका रुग्णालयांसाठी अत्याधुनिक वॉशिंग मशीन, वैद्यकीय विद्यार्थ्यांसाठी ७८ प्रकारची पुस्तके आणि जिजामाता रुग्णालयातील सी-आर्म व एक्स-रे मशीनचे सॉफ्टवेअर बदलण्यास मंजुरी देण्यात आली. सावित्रीबाई फुले अकादमीमार्फत यूपीएससी विद्यार्थ्यांना मोफत मार्गदर्शन देण्याच्या उपक्रमालाही मुदतवाढ देण्यात आली.
याशिवाय शहरातील १०० गणेश विसर्जन स्थळांवर निर्माल्य संकलनासाठी कलश खरेदी व वितरण, विविध महापालिका कार्यक्रमांसाठी मंडप व्यवस्था आणि प्रभागनिहाय स्थापत्य व विद्युतविषयक कामांच्या प्रस्तावांनाही मंजुरी देण्यात आली.
