पं. धनंजय जोशी आणि धनश्री देशपांडे यांच्या गायनाची मेजवानी
नवी दिल्ली (विशेष प्रतिनिधी): दीपावलीच्या मंगलमय पर्वानिमित्त महाराष्ट्र सदन, नवी दिल्ली यांच्या वतीने आणि सांस्कृतिक कार्य संचालनालय, महाराष्ट्र राज्य यांच्या सहकार्याने मंगळवार, ३ नोव्हेंबर रोजी सायंकाळी ६.३० वाजता नवीन महाराष्ट्र सदन, कस्तुरबा गांधी मार्ग, नवी दिल्ली येथे ‘सूर दीपावली’ या विशेष संगीत सोहळ्याचे आयोजन करण्यात आले आहे.
दीपावलीच्या आनंदोत्सवात संगीत स्वरांनी रंग भरणाऱ्या या कार्यक्रमात रसिकांना अभंग, नाट्यगीते आणि भावगीतांची मेजवानी अनुभवता येणार आहे. या सोहळ्यात गायक सुरमणी पं. धनंजय जोशी आणि गायिका धनश्री देशपांडे आपल्या गायनाने उपस्थितांना मंत्रमुग्ध करणार आहेत.
या संगीत सोहळ्यासाठी प्रवेश विनामूल्य असून, राजधानी दिल्लीतील मराठी आणि संगीतप्रेमीं नागरिकांनी मोठ्या संख्येने उपस्थित राहून या सांस्कृतिक पर्वाचा आनंद घ्यावा, असे आवाहन निवासी आयुक्त तथा सचिव डॉ. श्वेता सिंघल यांनी केले आहे.
