गळती रोखण्यासाठी फिरते पथक, वाहन धुणाऱ्यांना दंड आणि पाणी व्यवस्थापन समिती स्थापन करण्याची मागणी
पिंपरी-चिंचवड, दि. २९ ऑक्टोबर २०२६ : पिंपरी-चिंचवड शहराची वाढती लोकसंख्या आणि झपाट्याने होणारे शहरीकरण लक्षात घेता आगामी काळात संभाव्य पाणीटंचाईचे गंभीर संकट निर्माण होण्याची शक्यता आहे. या संकटाचा सामना करण्यासाठी महापालिका प्रशासनाने आतापासूनच प्रतिबंधात्मक उपाययोजना कराव्यात, अशी मागणी विरोधी पक्षनेते भाऊसाहेब सोपानराव भोईर यांनी केली आहे. पाणीगळती रोखण्यासाठी फिरते दुरुस्ती पथक स्थापन करणे, पिण्याच्या पाण्याने वाहने धुणाऱ्यांवर दंडात्मक कारवाई करणे, नवीन मोठ्या बांधकामांतील पाणीवापरावर नियंत्रण ठेवणे आणि विशेष पाणी व्यवस्थापन समिती स्थापन करणे, अशा विविध उपाययोजना त्यांनी सुचवल्या आहेत.
शहराची लोकसंख्या ३० लाखांच्या पुढे गेल्याने पाण्याची मागणी दिवसेंदिवस वाढत आहे. आगामी काळातील संभाव्य पाणीटंचाई लक्षात घेऊन प्रशासनाने केवळ संकट उद्भवल्यानंतर उपाययोजना करण्याऐवजी आतापासूनच पाण्याचे नियोजन, काटकसरीने वापर आणि उपलब्ध जलस्रोतांचे प्रभावी व्यवस्थापन करण्यावर भर द्यावा, असे भोईर यांनी म्हटले आहे.
पाणीगळती रोखण्यासाठी फिरते दुरुस्ती पथक
शहरातील घरे, व्यावसायिक इमारती आणि कार्यालयांमधील नळ व पाइपलाइनची गळती रोखण्यासाठी महापालिकेने स्वतंत्र फिरते दुरुस्ती पथक स्थापन करावे. नागरिकांच्या मागणीनुसार नाममात्र शुल्कात किंवा मोफत गळती दुरुस्तीची सुविधा उपलब्ध करून द्यावी. यामुळे मोठ्या प्रमाणात होणारा पाण्याचा अपव्यय टाळता येईल, अशी सूचना त्यांनी केली आहे.
वाहन धुणाऱ्यांवर एक हजार रुपयांच्या दंडाची मागणी
पिण्याच्या पाण्याने कार, दुचाकी आणि इतर वाहने धुण्यास बंदी घालावी. त्याऐवजी ओल्या फडक्याचा वापर करण्याबाबत नागरिकांना सूचना द्याव्यात. तसेच घरासमोरील अंगण, फरशी आणि पटांगण पाण्याने धुण्यावरही निर्बंध आणावेत. या नियमांचे उल्लंघन करणाऱ्यांवर जागेवरच किमान एक हजार रुपयांचा दंड आकारण्यात यावा, अशी मागणी भोईर यांनी केली आहे.
नवीन बांधकामांच्या पाणीवापरावर नियंत्रण
पाण्याची उपलब्धता आणि संभाव्य टंचाईचा विचार करून नवीन मोठ्या बांधकामांमधील पाणीवापरावर तात्पुरते निर्बंध घालण्याची मागणीही त्यांनी केली आहे. शहरातील सार्वजनिक आणि खासगी विहिरी तसेच बोअरवेल यांचे सर्वेक्षण करून, लागू कायदेशीर तरतुदींनुसार त्यांच्या वापराचे नियोजन व समन्वय महापालिकेने करावा. उपलब्ध जलस्रोतांचा योग्य वापर करून पाणीवाटपासाठी सक्षम यंत्रणा उभारावी, असेही त्यांनी सुचवले आहे.
पाणी व्यवस्थापन समिती स्थापन करण्याची मागणी
शहरातील पाणीपुरवठा, उपलब्ध जलसाठे, गळती, पाण्याची मागणी आणि वितरण यावर नियमित देखरेख ठेवण्यासाठी विशेष पाणी व्यवस्थापन समिती स्थापन करावी. या समितीची दर १५ दिवसांनी बैठक घेऊन परिस्थितीचा आढावा घ्यावा आणि आवश्यक निर्णय तातडीने घ्यावेत, अशी मागणी भोईर यांनी केली आहे.
पाणीबचतीसाठी नागरिकांमध्ये जनजागृती
घरातील फ्लश टँकचा अनावश्यक वापर टाळणे, शॉवरऐवजी बादलीतील मोजक्या पाण्याने स्नान करणे आणि भांडी धुतल्यानंतरचे तुलनेने स्वच्छ वापरलेले पाणी झाडांसाठी किंवा बागेसाठी पुनर्वापरात आणणे, याबाबत नागरिकांमध्ये व्यापक जनजागृती मोहीम राबवावी. त्याचबरोबर पाणीबचतीसाठी नागरिकांकडून व्यावहारिक सूचना मागवून त्यांचा नियोजनात समावेश करावा, असेही त्यांनी म्हटले आहे.
गरजूंसाठी झुणका-भाकर केंद्रे सुरू करा
संभाव्य टंचाईच्या काळात आर्थिकदृष्ट्या दुर्बल नागरिक आणि कष्टकरी वर्गाला दिलासा देण्यासाठी सेवाभावी संस्थांना आर्थिक व पायाभूत सहकार्य करावे. त्यांच्या माध्यमातून शहरात माफक दरात भोजन उपलब्ध करून देणारी झुणका-भाकर किंवा तत्सम अन्नछत्र केंद्रे सुरू करण्याचाही विचार करावा, अशी सूचना भोईर यांनी केली आहे.
“ही मागणी राजकीय विरोधासाठी नव्हे, तर सजग नागरिक म्हणून संभाव्य संकटाची जाणीव ठेवून केली आहे. पाणीटंचाईचे संकट निर्माण झाल्यानंतर धावपळ करण्यापेक्षा महापालिकेने आताच ठोस आणि प्रभावी उपाययोजना कराव्यात. पाण्याचा प्रत्येक थेंब महत्त्वाचा असून, प्रशासनाने या विषयाला सर्वोच्च प्राधान्य द्यावे,”
……भाऊसाहेब सोपानराव भोईर, विरोधी पक्षनेते,पिंपरी चिंचवड.
