बनावट अटक वॉरंट, सरकारी कागदपत्रे दाखवत ‘मनी लाँड्रिंग’च्या गुन्ह्याची भीती; विविध खात्यांवर रक्कम जमा करण्यास भाग पाडले
पिंपरी-चिंचवड : पोलिस अधिकारी असल्याचे भासवून एका ६८ वर्षीय महिलेची तब्बल ७६ लाख २२ हजार ५४१ रुपयांची ऑनलाइन फसवणूक केल्याचा प्रकार चिखली परिसरात उघडकीस आला आहे. व्हॉट्सॲप कॉलद्वारे संपर्क साधून महिलेच्या आधारकार्डवरून सिमकार्ड काढण्यात आल्याचे सांगत, त्या सिमकार्डचा वापर गैरप्रकार, दहशतवादी संघटना आणि मनी लाँड्रिंगशी संबंधित गुन्ह्यांसाठी झाल्याची भीती दाखवण्यात आली. त्यानंतर बनावट अटक वॉरंट, नोटिसा व शासकीय कागदपत्रे दाखवून महिलेला धमकावत तिच्याकडून विविध बँक खात्यांमध्ये मोठी रक्कम जमा करून घेतल्याचे पोलिसांनी नोंदविलेल्या फिर्यादीत म्हटले आहे.
याप्रकरणी सायबर पोलिस ठाण्यात गुन्हा रजि. क्र. ४१/२०२६ नुसार भारतीय न्याय संहितेतील विविध कलमांसह माहिती तंत्रज्ञान कायद्यातील कलम ६६(सी), ६६(डी) अन्वये गुन्हा दाखल करण्यात आला आहे. गुन्हा २२ सप्टेंबर २०२६ रोजी सायंकाळी ४.४३ वाजता दाखल करण्यात आला.
पोलिसांच्या नोंदीनुसार, २ सप्टेंबर रोजी सकाळी ११.४८ वाजल्यापासून ९ सप्टेंबर रोजी सकाळी ११.३० वाजेपर्यंतच्या कालावधीत आरोपींनी व्हॉट्सॲपवरून महिलेशी संपर्क साधला. पोलिस अधिकारी असल्याचे भासवून त्यांच्या आधारकार्डचा गैरवापर करून सिमकार्ड काढण्यात आल्याचे सांगण्यात आले. तसेच त्या सिमकार्डशी संबंधित गंभीर स्वरूपाचे गुन्हे दाखल असल्याचे सांगून महिलेला घाबरविण्यात आले.
याचदरम्यान आरोपींनी सर्वोच्च न्यायालयाचे बनावट अटक वॉरंट, विविध नोटिसा आणि शासकीय दस्तऐवज असल्याचे भासविणारी कागदपत्रे डिजिटल माध्यमातून दाखविल्याचा आरोप आहे. महिलेवर दबाव निर्माण करून तिच्या घरातच डिजिटल पद्धतीने ‘अटक’ केल्याप्रमाणे परिस्थिती निर्माण करण्यात आली. तसेच तिच्याकडील सर्व रक्कम ‘शासनाकडे जमा करून पडताळणी केल्यानंतर परत मिळेल’, असे सांगण्यात आल्याचे फिर्यादीत नमूद आहे.
या भूलथापांना बळी पडून महिलेने आरोपींनी सांगितलेल्या विविध बँक खात्यांमध्ये एकूण ७६,२२,५४१ रुपये जमा केल्याचे पोलिसांनी नोंदविले आहे. त्यानंतर आरोपींनी बनावट शासकीय पावत्या दाखवून महिलेची आर्थिक फसवणूक केल्याचा आरोप आहे.
या प्रकरणात व्हॉट्सॲप क्रमांकाचा धारक व वापरकर्ता तसेच Nixel Software Solutions Private Limited, Tapati Enterprise आणि Softgenix Professionals Pvt. Ltd. यांच्या नावावरील बँक खात्यांशी संबंधित धारक/वापरकर्ते आणि या प्रकारात सहभागी असलेल्या इतर साथीदारांविरुद्ध गुन्हा दाखल करण्यात आला आहे. आरोपी अद्याप अटक झालेले नसल्याचे पोलिस नोंदीत नमूद आहे.पुढील तपास सपोनि भोपळे व पोनि गायकवाड करीत आहेत.
