कमलाकर अंबादास गायकवाड यांची शिवसेना झोपडपट्टी महासंघाच्या पिंपरी-चिंचवड शहराध्यक्षपदी निवड
पिंपरी, प्रतिनिधी : शिवसेना झोपडपट्टी महासंघाच्या पिंपरी-चिंचवड शहराध्यक्षपदी सामाजिक कार्यकर्ते कमलाकर अंबादास गायकवाड यांची निवड करण्यात आली आहे. झोपडपट्टीधारक, गरीब, वंचित व गरजू नागरिकांच्या प्रश्नांसाठी त्यांनी केलेल्या सामाजिक व संघटनात्मक कार्याची दखल घेत ही नियुक्ती करण्यात आली.
शिवसेना झोपडपट्टी महासंघाचे महाराष्ट्र प्रदेशाध्यक्ष सुमित वजाळे, पश्चिम महाराष्ट्र अध्यक्ष उत्तम कांबळे आणि पुणे जिल्हाध्यक्ष अनिल बनसोडे यांच्या वतीने गायकवाड यांच्यावर पिंपरी-चिंचवड शहरातील संघटनात्मक जबाबदारी सोपविण्यात आली आहे.
पिंपरी-चिंचवड शहरातील झोपडपट्टीधारक तसेच वंचित घटकांच्या विविध समस्या शासन व प्रशासनाच्या दरबारी प्रभावीपणे मांडणे, नागरिकांच्या न्याय्य हक्कांसाठी आवाज उठविणे आणि संघटनेचे कार्य शहराच्या प्रत्येक भागात पोहोचविणे, या प्रमुख जबाबदाऱ्या गायकवाड यांच्यावर सोपविण्यात आल्या आहेत.
नियुक्तीनंतर प्रतिक्रिया देताना कमलाकर अंबादास गायकवाड म्हणाले, “माझ्यावर सोपविण्यात आलेली जबाबदारी प्रामाणिकपणे पार पाडत पिंपरी-चिंचवड शहरातील झोपडपट्टीधारक आणि वंचित नागरिकांच्या न्याय व हक्कांसाठी सातत्याने काम करणार आहे. संघटनेची भूमिका तळागाळातील नागरिकांपर्यंत पोहोचवून संघटना अधिक मजबूत करण्यासाठी प्रयत्नशील राहणार आहे.”
गायकवाड यांच्या निवडीबद्दल शिवसेना झोपडपट्टी महासंघाचे पदाधिकारी, कार्यकर्ते तसेच सामाजिक क्षेत्रातील विविध मान्यवरांनी त्यांचे अभिनंदन करून पुढील वाटचालीस शुभेच्छा दिल्या.
