नवी सांगवी-पिंपळे गुरव परिसरात मानवी हक्क संरक्षण आणि जागृती व मनपा आरोग्य विभागाचा संयुक्त उपक्रम
पिंपरी, दि. १७ सप्टेंबर २०२६ : गणेशोत्सवाच्या पार्श्वभूमीवर नागरिकांच्या आरोग्याची काळजी घेत नवी सांगवी व पिंपळे गुरव परिसरात डेंग्यू आणि चिकनगुनिया आजाराबाबत व्यापक जनजागृती मोहीम राबविण्यात येत आहे. मानवी हक्क संरक्षण आणि जागृती व महापालिका आरोग्य विभागाच्या संयुक्त विद्यमाने दररोज सायंकाळी ७ ते ९ या वेळेत गणेश मंडळांमध्ये स्पीकरद्वारे माहिती देण्याबरोबरच माहितीपत्रकांचे वाटप करण्यात येत आहे.
दररोज पाच गणेश मंडळांमध्ये ही जनजागृती केली जात असून, डेंग्यू होऊ नये यासाठी घ्यावयाची काळजी, डासांची उत्पत्ती रोखण्यासाठी करावयाच्या उपाययोजना तसेच आजाराची लक्षणे आढळल्यास घ्यावयाची खबरदारी याबाबत गणेशभक्तांना माहिती देण्यात येत आहे. मानवी हक्क संरक्षण आणि जागृतीचे शहराध्यक्ष आण्णा जोगदंड हे स्वतः स्पीकरद्वारे गणेशभक्तांना मार्गदर्शन करत आहेत. ही जनजागृती मोहीम अनंत चतुर्दशीपर्यंत सुरू राहणार असल्याचे जोगदंड यांनी सांगितले.
आरोग्य निरीक्षक स्नेहल सोनवणे यांनी डेंग्यूबाबत नागरिकांना सतर्क करताना, “डंक छोटा, धोका मोठा” असे सांगितले. ताप, डोकेदुखी, अंगावर लालसर पुरळ येणे, तीव्र पाठदुखी, अंगावर पुरळ उठणे आदी लक्षणे दिसून आल्यास नागरिकांनी विलंब न करता डॉक्टरांचा सल्ला घ्यावा, असे आवाहन त्यांनी केले.
यावेळी आण्णा जोगदंड यांनी गणेशभक्तांना प्लास्टिकचा वापर टाळण्याची तसेच पर्यावरण संवर्धनाची शपथ दिली.
पाच गणेश मंडळांमध्ये जनजागृती
या मोहिमेअंतर्गत महाराष्ट्र मित्र मंडळ, समतानगर मित्र मंडळ, सत्ता प्रतिष्ठान, शिव प्रतिष्ठान आणि शिवराया मित्र मंडळ येथे जनजागृती करण्यात आली.
या वेळी शहराध्यक्ष आण्णा जोगदंड, आरोग्य निरीक्षक स्नेहल सोनवणे, नगरसेविका दीप्ती कांबळे, बेसिक टीमचे पवन रंधे, महाराष्ट्र मित्र मंडळाचे अध्यक्ष मनीष भापकर, मानवी हक्क संरक्षण आणि जागृतीच्या पश्चिम महाराष्ट्र महिला अध्यक्षा संगीता जोगदंड, कार्याध्यक्ष मुरलीधर दळवी, समतानगर मित्र मंडळ उत्सव समितीचे धीरज बारणे, उपाध्यक्ष अनिरुद्ध बारणे, सचिव अक्षय कुंभार, केदार घोरपडे, मनोज मदने, तेजस पाटील, अखिल देसाई, सत्ता प्रतिष्ठानचे अध्यक्ष प्रतीक जाधव, संस्थापक सौरभ शिंदे, शिव प्रतिष्ठानचे अध्यक्ष प्रशांत माटुर, उपाध्यक्ष अविनाश इंदलकर, कार्याध्यक्ष विशाल नाथबोने, सचिव निलेश गाडेकर, प्रसाद पवार, शिवराया मित्र मंडळाचे अध्यक्ष रोहित भिसे, रोहित राऊत, सा.का. शिवानंद तालीकोटी, वसंत मांडे, ह.भ.प. अशोक ढोरे, सा.का. दीपक गायकवाड, महाराष्ट्र मित्र मंडळाचे उपाध्यक्ष दीपक गायकवाड, खजिनदार राजेश साळुंखे तसेच विजय इंगळे, मेल्विन मेंड्रोस, मनोज जगताप, संदीप बर्गे, निखिल जगताप, कुलदीप गुजर, सचिन बर्गे, ध्रुविल भिलारे आदींसह विविध गणेश मंडळांचे पदाधिकारी उपस्थित होते.
