आबूरोड येथे राष्ट्रीय मीडिया सम्मेलन-२०२६चा दिमाखात शुभारंभ; सकारात्मक, मूल्यनिष्ठ आणि उत्तरदायी पत्रकारितेचा संकल्प
राजस्थान/आबूरोड, दि. १० सप्टेंबर : समाजात सकारात्मकता, शांतता, सद्भावना आणि मानवी मूल्यांची रुजवणूक करण्यासाठी माध्यमांनी अधिक सशक्त, उद्देशपूर्ण आणि उत्तरदायी भूमिका बजावण्याची गरज आहे. श्रेष्ठ विश्वाच्या निर्मितीत मीडिया हे प्रभावी माध्यम ठरू शकते, असे प्रतिपादन मीडिया विंगचे अध्यक्ष राजयोगी बी.के. करुणा भाई यांनी केले.
ब्रह्माकुमारी संस्थेच्या मीडिया व जनसंपर्क प्रभागातर्फे आयोजित राष्ट्रीय मीडिया सम्मेलन-२०२६चा शुभारंभ उत्साहपूर्ण वातावरणात झाला. ‘श्रेष्ठ विश्वाच्या निर्मितीसाठी सशक्त मीडिया’ या मुख्य विषयावर आयोजित या संमेलनासाठी देशभरातील पत्रकार, मीडिया प्रतिनिधी आणि तज्ज्ञ मोठ्या संख्येने उपस्थित होते. उद्घाटन सत्रात उपस्थितांनी सकारात्मक, मूल्यनिष्ठ आणि जबाबदार पत्रकारितेचा सामूहिक संकल्प केला.
“हे राष्ट्रीय संमेलन असले तरी येथे होणारे चिंतन संपूर्ण विश्वाच्या कल्याणासाठी आहे. भारत विश्वगुरू होण्याच्या दिशेने वाटचाल करीत असताना सकारात्मक परिवर्तनाच्या या प्रवासात माध्यमांची भूमिका अत्यंत महत्त्वाची आहे. माध्यमांनी केवळ बातम्या देणारे माध्यम न राहता सकारात्मक परिवर्तनाची वाहक शक्ती बनले पाहिजे.”
……करुणा भाई.
पत्रकारांनी आपल्या व्यस्त दिनचर्येतून वेळ काढून राजयोगाचा अभ्यास करावा. स्वतः शांततेचा अनुभव घेतल्यास समाजातही शांतता आणि सकारात्मकतेचा संदेश अधिक प्रभावीपणे पोहोचविता येईल, असेही त्यांनी सांगितले.
एका मिनिटाच्या मौनातून शांततेचा संदेश
मीडिया विंगच्या उपाध्यक्षा बी.के. सरला दीदी यांनी उपस्थित पत्रकारांना श्रेष्ठ विश्वनिर्मितीसाठी एक मिनिट मौन व मेडिटेशन करण्याचे आवाहन केले. या ध्यानसत्रामुळे संपूर्ण सभागृहात शांतता, सकारात्मकता आणि आत्मचिंतनाचे वातावरण निर्माण झाले.
मीडिया व जनसंपर्क प्रभागाचे राष्ट्रीय समन्वयक बी.के. निकुंज भाई यांनी संमेलनाचा उद्देश स्पष्ट केला. कृत्रिम बुद्धिमत्ता आणि आधुनिक तंत्रज्ञानामुळे माध्यमांची ताकद अनेक पटींनी वाढली असली, तरी समाजात खऱ्या अर्थाने सुख-शांती निर्माण करण्यासाठी मनाचे सशक्तीकरण आवश्यक आहे. “मीडिया केवळ पॉवरफुल नव्हे, तर पर्पजफुल असावा,” असा संदेश त्यांनी दिला.
‘वसुधैव कुटुंबकम्’च्या भावनेतून श्रेष्ठ विश्वाची निर्मिती
मुख्य वक्ते प्रा. (डॉ.) मानसिंह परमार, माजी कुलगुरू, केटीयूजेएम, रायपूर यांनी युद्ध, शस्त्रास्त्रांची स्पर्धा आणि वाढती जागतिक अस्थिरता यांचा संदर्भ देत मानवतेला प्रेम, शांतता आणि सद्भावनेची गरज असल्याचे सांगितले.
एका मुलाला जगाचा नकाशा जोडण्याचे काम देण्यात आले. त्याने नकाशाच्या मागील बाजूस असलेल्या माणसाच्या चित्रापासून सुरुवात केली. माणसाचे चित्र पूर्ण करताच जगाचा नकाशाही योग्यरीत्या जुळला. त्याचप्रमाणे प्रत्येक व्यक्तीला अधिक चांगले घडविले, तर श्रेष्ठ विश्वाची निर्मिती आपोआप शक्य होईल, असे त्यांनी उदाहरणातून स्पष्ट केले.
भारतीय संस्कृतीतील ‘वसुधैव कुटुंबकम्’ आणि ‘सर्वे भवन्तु सुखिनः’ ही विश्वकल्याणाची शिकवण माध्यमांनी समाजापर्यंत पोहोचवावी, असे आवाहन त्यांनी केले.
मीडिया लोकशाहीची ‘धडकन’ : डॉ. सरफराज सैफी
भारत न्यूज नेटवर्क, नवी दिल्लीचे सीईओ व एडिटर-इन-चीफ डॉ. सरफराज सैफी यांनी माध्यमांच्या वाढत्या जबाबदारीवर प्रकाश टाकला. “मीडिया हा केवळ लोकशाहीचा चौथा स्तंभ नसून लोकशाहीची धडकन आहे,” असे त्यांनी नमूद केले.
सोशल मीडियावर प्रसारित होणारी माहिती नागरिक अनेकदा सत्य मानतात. त्यामुळे कोणतीही माहिती प्रसारित करण्यापूर्वी तिची सत्यता आणि समाजावर होणारा परिणाम तपासणे अत्यावश्यक आहे. ब्रेकिंग न्यूजच्या स्पर्धेत चुकीच्या माहितीमुळे समाजात मानसिक ताण आणि गैरसमज निर्माण होऊ शकतात. त्यामुळे जबाबदार पत्रकारिता ही काळाची गरज आहे, असे त्यांनी स्पष्ट केले.
एआयच्या युगात पत्रकारितेची जबाबदारी अधिक वाढली
न्यूज इंडिया नेटवर्क, नवी दिल्लीचे सीईओ व एडिटर-इन-चीफ राणा यशवंत यांनी एआय, मशीन लर्निंग आणि सायबर वॉरच्या वाढत्या प्रभावावर भाष्य केले. तंत्रज्ञानाचा वापर मानवतेच्या हितासाठी कोणत्या दिशेने होत आहे, याचा गांभीर्याने विचार करण्याची गरज असल्याचे त्यांनी सांगितले.
मोबाईल आणि अल्गोरिदम व्यक्तीला कोणती माहिती आणि कोणते विचार दिसतील, यावर प्रभाव टाकत आहेत. त्यामुळे माध्यमांनी केवळ माहिती देण्याऐवजी नागरिकांना शिक्षित, जागरूक आणि विवेकी बनविण्याची जबाबदारी स्वीकारावी, असे त्यांनी स्पष्ट केले.
राजयोगातून अनुभवली गहन शांतता
जयपूर सबझोनच्या प्रभारी राजयोगिनी बी.के. सुषमा दीदी यांनी उपस्थित पत्रकारांना राजयोग मेडिटेशनचा अनुभव दिला. ध्यानसत्रादरम्यान उपस्थितांनी गहन शांतता आणि सकारात्मक ऊर्जेचा अनुभव घेतला.
यावेळी कटक येथील ओडिसी डान्स अकादमीच्या कलाकारांनी मनमोहक नृत्य सादर केले. **
