मुंबई, दि. १९ ऑगस्ट : जुन्नर तालुक्यातील पिंपळवंडी येथे साडेनऊ वर्षांच्या चिमुकलीवर अत्याचार करून तिची निर्घृण हत्या करण्यात आल्याची घटना अत्यंत दुर्दैवी आणि धक्कादायक आहे. या प्रकरणाचा पुणे जिल्ह्याचे पोलीस अधीक्षक संदीप सिंह गिल यांच्याशी दूरध्वनीवरून आढावा घेतला असून, प्रकरणाची पारदर्शक व सखोल चौकशी करून आरोपीवर कठोर कारवाई करण्याचे स्पष्ट निर्देश देण्यात आले आहेत, अशी माहिती उपमुख्यमंत्री तथा पुणे जिल्ह्याच्या पालकमंत्री सुनेत्रा अजित पवार यांनी दिली.
फास्ट ट्रॅक कोर्टासाठी मुख्यमंत्र्यांकडे विनंती…
या घटनेबद्दल तीव्र दुःख व्यक्त करताना उपमुख्यमंत्री सुनेत्रा पवार म्हणाल्या, “हे कृत्य अत्यंत निंदनीय असून माणुसकीला काळिमा फासणारे आहे. पोलिसांनी तत्परतेने कारवाई करत संशयित तरुणाला ताब्यात घेतले असून, पुढील तपास वेगाने सुरू आहे. आरोपीला लवकरात लवकर कठोर शिक्षा मिळावी, यासाठी हा खटला जलदगती न्यायालयात चालविण्याची विशेष विनंती मुख्यमंत्री तथा गृहमंत्री देवेंद्र फडणवीस यांच्याकडे करणार आहे.”
पीडित कुटुंबाची लवकरच भेट घेणार…
पीडित कुटुंबाच्या पाठीशी शासन खंबीरपणे उभे असल्याचेही उपमुख्यमंत्र्यांनी स्पष्ट केले. त्या लवकरच स्वतः पिंपळवंडी येथे जाऊन पीडित कुटुंबीयांची भेट घेणार असून, कुटुंबाला आवश्यक ती सर्व मदत शासनाच्या माध्यमातून उपलब्ध करून दिली जाईल, असे त्यांनी सांगितले.
