पिंपरी-चिंचवड | प्रतिनिधी….पिंपरी-चिंचवड पोलीस आयुक्तालयातील नियत वयोमानानुसार जुलै २०२६ महिन्यात सेवानिवृत्त झालेल्या ८ पोलीस अधिकारी व अंमलदारांचा सन्मान व निरोप समारंभ शुक्रवारी (दि. ३१ जुलै २०२६) दुपारी १ वाजता पोलीस आयुक्तालयातील ‘शिवनेरी हॉल’ येथे उत्साहात पार पडला.
पोलीस आयुक्त मा. विनय कुमार चौबे यांच्या मार्गदर्शनाखाली आयोजित या कार्यक्रमात सेवानिवृत्त अधिकारी व कर्मचाऱ्यांचा त्यांच्या कुटुंबीयांसह शाल, श्रीफळ, पुष्पगुच्छ, सेवानिवृत्ती प्रमाणपत्र, ओळखपत्र, शुभेच्छापत्र, स्मृतिचिन्ह, झाडाचे रोपटे आणि भेटवस्तू देऊन गौरव करण्यात आला. यावेळी मान्यवरांनी त्यांच्या दीर्घ, प्रामाणिक व कर्तव्यनिष्ठ सेवेसाठी कृतज्ञता व्यक्त करत पुढील आयुष्यासाठी उत्तम आरोग्य, आनंद आणि यशस्वी वाटचालीच्या शुभेच्छा दिल्या.
यंदा सेवानिवृत्त झालेल्या अधिकारी व अंमलदारांमध्ये पोलीस उपनिरीक्षक अमोल यशवंत धायगुडे (बिनतारी संदेश विभाग), श्रेणी पोलीस उपनिरीक्षक सिताराम सखाराम केवळ (वाहतूक विभाग), बबन गणपत विरणक (पोलीस मुख्यालय), दिनेश रामराव ढवळे (चिखली पोलीस स्टेशन), लता बाळीशा अंबरगी (पोलीस मुख्यालय), हेमा एकनाथ भवारी (पोलीस मुख्यालय), सहायक पोलीस उपनिरीक्षक केशव सहादू शेळके (वाहतूक विभाग) आणि पोलीस शिपाई महादेव गोरख सुरवसे (पोलीस मुख्यालय) यांचा समावेश आहे.
समारंभाला पोलीस सहआयुक्त शशिकांत महावरकर, अपर पोलीस आयुक्त (गुन्हे) सारंग आवाड, अपर पोलीस आयुक्त (प्रादेशिक विभाग) बसवराज तेली, पोलीस उपआयुक्त (विशेष शाखा व तात्पुरता कार्यभार मुख्यालय) धीरज पाटील, सहायक पोलीस आयुक्त (प्रशासन) रणजित पाटील, वरिष्ठ पोलीस निरीक्षक संजय नरावाड (कल्याण शाखा), सहायक पोलीस निरीक्षक राकेश भामरे (कल्याण शाखा), सेवानिवृत्त अधिकारी-अंमलदार, त्यांचे कुटुंबीय तसेच पिंपरी-चिंचवड पोलीस आयुक्तालयातील अधिकारी व कर्मचारी मोठ्या संख्येने उपस्थित होते.
या कार्यक्रमात सेवानिवृत्त अधिकारी व कर्मचाऱ्यांच्या उल्लेखनीय सेवेला सलाम करत त्यांना भावपूर्ण निरोप देण्यात आला.
