चाकण (द.महाळुंगे) प्रतिनिधी दि. २६ जुलै : दक्षिण महाळुंगे एमआयडीसी पोलीस ठाण्यात सायबर फसवणुकीप्रकरणी एका व्यक्तीसह त्याच्या इतर साथीदारांविरुद्ध गुन्हा दाखल करण्यात आला आहे.
पोलीसांनी दिलेल्या माहितीनुसार, दि. ११ जुलै २०२५ ते १६ जानेवारी २०२६ या कालावधीत बँक ऑफ महाराष्ट्र, महाळुंगे शाखेतील “Samarth Tours And Travells” या नावाने उघडण्यात आलेल्या खात्याचा वापर सायबर फसवणुकीसाठी करण्यात आला. या खात्यामार्फत देशभरातील ३५ नागरिकांच्या सायबर फसवणुकीतील तक्रारींशी संबंधित एकूण ₹१,३१,८८१ इतक्या रकमेचे आर्थिक व्यवहार झाल्याचे तपासात निष्पन्न झाले.
या प्रकरणी शुशांत रविंद्र सोये (वय २९, रा. सारासिटी, खराबवाडी, ता. खेड, जि. पुणे) व त्याच्या इतर साथीदारांविरुद्ध भारतीय न्याय संहिता कलम ६१(२), ३१८(४), ३(५) तसेच माहिती तंत्रज्ञान अधिनियम, २००० च्या कलम ६६(डी) अंतर्गत गुन्हा दाखल करण्यात आला आहे.
या प्रकरणी सरकारतर्फे पोलीस शिपाई राजेंद्र परमेश्वर खेडकर यांनी फिर्याद दिली आहे. पुढील तपास पोलीस उपनिरीक्षक मोगले करीत असून, पोलीस निरीक्षक ढमाळ यांच्या मार्गदर्शनाखाली तपास सुरू आहे.
