नारायण सुर्वे जन्मशताब्दीनिमित्त पुरस्कार वितरण; डॉ. श्रीपाल सबनीस यांच्या हस्ते होणार सन्मान
पिंपरी-चिंचवड | प्रतिनिधी.…नारायण सुर्वे यांच्या जन्मशताब्दी वर्षानिमित्त आयोजित करण्यात आलेल्या पुरस्कार वितरण सोहळ्यात थरार न्यूज नेटवर्कचे संपादक तथा सामाजिक कार्यकर्ते रोहित खर्गे यांना प्रतिष्ठेचा ‘भला माणूस’ पुरस्कार जाहीर करण्यात आला आहे. त्यांच्या पत्रकारिता आणि सामाजिक क्षेत्रातील उल्लेखनीय योगदानाची दखल घेत हा सन्मान प्रदान करण्यात येणार असून, अखिल भारतीय साहित्य संमेलनाचे माजी अध्यक्ष तथा ज्येष्ठ साहित्यिक डॉ. श्रीपाल सबनीस यांच्या हस्ते पुरस्काराचे वितरण होणार आहे. ही माहिती नारायण सुर्वे साहित्य कला अकादमीचे सचिव तथा ज्येष्ठ साहित्यिक पुरुषोत्तम सदाफुले यांनी पत्रकार परिषदेत दिली.
नारायण सुर्वे साहित्य कला अकादमीच्या वतीने शुक्रवार, दि. १७ जुलै रोजी दुपारी १.३० वाजता चिंचवड येथील ऑटो क्लस्टरसमोरील सायन्स पार्क येथे भव्य पुरस्कार वितरण सोहळ्याचे आयोजन करण्यात आले आहे. जन्मशताब्दी वर्षाच्या निमित्ताने आयोजित या कार्यक्रमात साहित्य, पत्रकारिता, समाजसेवा, उद्योग, कला आणि विविध क्षेत्रांत उल्लेखनीय कार्य करणाऱ्या मान्यवरांचा गौरव करण्यात येणार आहे.
थरार न्यूज नेटवर्कचे संपादक रोहित खर्गे यांनी पत्रकारितेच्या माध्यमातून जनसामान्यांचे प्रश्न प्रभावीपणे मांडत सामाजिक बांधिलकी जपली आहे. विविध जनजागृती मोहिमा, सामाजिक उपक्रम आणि गरजूंसाठी केलेल्या सातत्यपूर्ण कार्याची दखल घेत नारायण सुर्वे साहित्य कला अकादमीने त्यांची ‘भला माणूस’ पुरस्कारासाठी निवड केली आहे.
या सोहळ्यास पिंपरी-चिंचवड महापालिकेचे विरोधी पक्षनेते भाऊसाहेब भोईर, उद्योजक राजेश सांकला, पद्मश्री नारायण सुर्वे साहित्य कला अकादमीचे अध्यक्ष तथा उद्योजक सुदाम भोरे, स्वानंद महिला संस्थेच्या अध्यक्षा शोभा बंब तसेच राष्ट्रपती पोलीस पदक विजेते ज्येष्ठ कवी सीताराम नरके यांची प्रमुख उपस्थिती लाभणार आहे.
साहित्य, पत्रकारिता आणि समाजसेवा क्षेत्रातील कार्यकर्त्यांचा गौरव करणाऱ्या या पुरस्कार सोहळ्याकडे शहरातील साहित्यप्रेमी, पत्रकार, सामाजिक कार्यकर्ते आणि नागरिकांचे लक्ष लागले असून, मोठ्या संख्येने उपस्थित राहून कार्यक्रमाची शोभा वाढवावी, असे आवाहन नारायण सुर्वे साहित्य कला अकादमीच्या वतीने करण्यात आले आहे.
