पुणे, दि. २२ मे : गुरुपुष्यामृत योगाच्या शुभ मुहूर्तावर मानाच्या पहिल्या श्री कसबा गणपती मंडळ तर्फे श्रींची मूर्ती घडवण्यासाठी वापरण्यात येणाऱ्या मातीच्या मृदा पूजनाचा मंगल सोहळा गुरुवारी उत्साहात पार पडला. हा विधी मंडळाचे मूर्तिकार अभिजीत धोंडफळे यांच्या रास्ता पेठ येथील स्टुडिओमध्ये संपन्न झाला.
प्रसिद्ध कीर्तनकार ह.भ.प. श्री वासुदेव बुवा बुरुसे यांच्या शुभहस्ते मृदा पूजन करण्यात आले. यावेळी बोलताना श्री बुरुसे म्हणाले, “माझ्या आयुष्यातील हा परमोच्च क्षण आहे. ज्या श्री कसबा गणपतीच्या परिसरात माझा जन्म झाला आणि मी वाढलो, त्या भगवंताच्या मृदा पूजनाची संधी मिळणे हे माझ्यासाठी मोठे सौभाग्य आहे.”
या सोहळ्यास मंडळाचे अध्यक्ष श्रीकांतजी शेटे, विश्वस्त, पदाधिकारी, कार्यकर्ते तसेच लोकसेवा प्रतिष्ठान चे उपाध्यक्ष श्रीधरभाऊ चव्हाण आणि रमणबाग युवा मंच चे अध्यक्ष शांतिसागर निपुणगे उपस्थित होते.भक्तिमय वातावरणात पार पडलेल्या या सोहळ्यामुळे आगामी गणेशोत्सवाच्या तयारीला औपचारिक सुरुवात झाल्याची भावना उपस्थितांनी व्यक्त केली.
